Gerîla Nûda: Pê kayanê gemarinan ê dewlete mexapîyê

Gerîlaya YJA-Starî Nûda Tolhildan venga keyeyanê verê bînaya HDPyî ya Amedî da û vat: ''Ez venga dadîya xo û keyeyanê bînanê ke verê HDPyî de ronişenê dana wa pê kayanê gemarinan ê dewlete mexapîyê.''

Gerîlaya YJA-Starî Nûda Tolhildan (Ceylane Tekîn) venga keyeyanê ke dewleta tirke pê provakasyonan verê bînaya HDPyî de nişnayî ro da. 

Nûda Tolhildan wina qisey kerd:

''Nê keyeyî hetê dewlete ra xapîyayî.  Wexto ke mi radyo goşdarî kerdêne bi hawayêkê tesadufî ez pê hesîyaya ke dadîya mi zî mîyanê înan de ya. Dadîya mi bi ziwano ke dewlete tira empoze kerdo qisey kerdêne. Mi fam kerd ke keyeyê mi xapîyayo. Coka sere de dadîya xo mi waşt ez venga nê keyeyan bida. Domanê şima bi waştişê xo ameyî nê koyan. PKK têgêrayîşêkê azadîye yo. Çew nêeşkeno pê zorî tewrê PKKyî bibo.

Wa keyeyê bizanê ke eke domanê şima tîya de yê o çax ê wayîrê îradeyêkê pîlî yê, perwerê Rayberîye, şehîdan û şarê xo yê. Ganî keyeyî pê nê tewirî sereberz bibê.

Ganî dadîya mi pê gerîlabîyayîşê mi sereberz biba. No tewir û hîs her kesî rê nasîb nêbenê. Nê koyan de têkoşîn, ciwîyayîş, şinasnayîşê felsefeya Rayberîye vera sîstemî serewedaritiş o, awanîya cuyêka newîye ya. Ganî keyeyî pê na hîşmendîye nêzdîyê ma bibê.

Dewlete her roje vera gerîlayan şer kena û 90 serrran ra zêdêr o vera kurdan polîtîkaya qirkerdişî ana ca. La PKK rixmê hende çîyan derban dano dişmenî ro. No zî dişmen de hêrs û kîn aferneno. Coka dewlete keyeyan vera gerîlayan xebitnena. Wa keyeyî bizanê ke dewlete seba ke ma ra qesasê xo bigêra nêzdîyê înan bena. 

Ez reyne şexsê dadîya xo venga ê keyeyan dana ke wa pê na raştîye bihesîyê. Rîyê raştikênî yê dişmenî bivînê. Pê kayanê gemarinan ê dewlete mexapîyê. Dewlete kena ke kurdan pê destê kurdan bida kiştene. Pê hîşmendîya welatperwerîye tewiro ke layîqê Rayberîye, têkoşînê azadîye yo bimojnê.

Ez pê îrade û waştişê xo tewra PKKyî bîya. Dadîya mi se bikerdêne zî ez mîyanê ê sîstemî de nêmendêne. Xeylêk ciwanê ma yê wendeyî estê. La wexto ke nê ciwanî fekê xo akenê, sîstemî rexne kenê cade erzîyenê zîndanan. Seba ke ez vera dewlete pê ziwanê ci têkoşîn bikera mi bire daye ke bêra tîya. 

Ez keyeyan ra vana ke na xeletîya xo ra apey abigêrê. No tewirêko rûmetên o. Merdimî xora xeletîye kenê. Dewlete beno ke qelsîya înan şuxilnaye. La wa keyeyî dewlete ra vajê 'mi kayê to dîyo' û bibê wayîrê tewirê raştikênî. No do dişmenî rê bibo lapatêk û dişmenî bin bivisno.

Ez hêvî kena ke keyeyî do wina têbigêrê. Eke ê domananê xo ra hes kenê wa wina bikerê, wayîrê têkoşînê domananê xo vejîyê. Ma tîya de se kenê seba heskerdişê keyeyê xo kenê. Ez tîya ra venga pêro şarê kurdî, keyeyanê ma dana ke her çiqas ê pê dişmenî xapîyayê zî seba ma ercîyaye yê, girîng ê. Wa keyeyî naye bizanê.''