Gerîlayanê HPG û YJA Starî Herêmanê Pawitişî yê Medya roşanê azadîye û xoverdayîşî yê şarê kurdî Newroze pîroz kerd. Şayîya ke bi coşî ameye kerdene bi merasîmê leşkerî dest pêkerd. Endamê Fermandarîya Konseya HPGyî Rizgar Êrsîyo ke tewrê şayîye bi tîya qiseykerdişêk kerd.

Rizgar Êrsî Newroze pîroz kerd û vat: ''Sey tim ameyox de zî do têkoşînê gerîlayanê azadîye dewam bikero. Şarê ma semedê azadkerdişê Rayber Apoyî têkoşîn keno. No têkoşîn do pîlêr bo. Gerîlayê Kurdîstanî vera dewleta tirke rolê xo yê tarîxî kay kenê. Ewro ra tepîya zî ma do layiqê Rayber Apo, şehîdan û şarê xo bi. Ma do 24 saete semedê rayîr û metodanê serkewtişî têbigêrê û semedê nê têkoşîn bikerê. Na çarçewe de bi nameyê fermandarîya ma ez Newroza heme embazan pîroz kena, Biciwîyo Newroze, Biciwîyo Serek Apo.''

Fermandarê gerîlayan ard ziwan ke Newroze semedê kurdan yena manaya azadîye û vat: ''Newroze xeylêk wext goreyê manaya xo nêameye pîrozkerdene, heta ke serkêşîya Rayber Apoyî de 1973 de kombîyayîşêk ame kerdene. Xora Newroze têkoşîn û azadîye ya. Badê hemleya Çubukî her serre adirê Newroze zafêr bi gur. Şar reyna dormeyê adirê Newroze de ame têhet û yewîya xo xurtêr kerd. Ewro şarê ma sey mîloyonan vejîyeno waran û Newroze pîroz keno.''

Rizgar Êrsî bale ante têkoşînê gerîlayan ê waranê Garê, Mam Reşo, Girê Sorî, Zendûra û Werxelê ser ke par hêrişê dewleta tirke betal kerdî û vat: '''Dewleta tirke emser zî amadekarîya hêrişanê winayênan kena la ê do reyna ser nêkewê. Çunke felsefeya Apoyîye de şero fedaî esto û no zî xo dir têkoşîn û azadîye ano. Reyna ma xo vîr  a mekerê ke ma pêro deyndarê Rayber Apoyî yê û eşkenê bi azadkerdişê ci yê fîzîkî deynê xo bidê.''

Şayîya ke gerîlayan sloganê sey ''Bê Serek cuye nêbena'', ''Biciwîyo Serek Apo'' û ''Cinî cuye azadîye'' eşte de adirêko xurt ê Newroze ame wekerdene. Qilanê berzan de flamayê PKKyî û posterê Abdullah Ocalanî ameyî daliqnayene. Gerîlayan Newroza yewbînan pîroz ked û dormeyê adirî de govende girewte.