Serrgêra 45. ya ronîyayîşê PKKyî Herêmanê Pawitişî yê Medya de bi merasîmêkî ameye fîrazkerdene. Fermandare Gulçîne Umut vat: ''Heta ke Rojhelatê Mîyanênî de zerrîyêke zî seba azadîye gulp bida nê koyan de xoverdayîş do dewam bikero.''
Serrgêra 45. ya ronîyayîşê PKKyî rixmê bombardumananê dewleta tirke ya îşxalkere zî Herêmanê Pawitişî yê Medya de bi merasîmêkî ameye fîrazkerdene.
Warê merasîmî bi alanê PKK, HPG û YJA-Starî xemilîya. Merasîmî bi deqayêkê rêzgirewtişî dest pêkerd. Fermandarê HPG û YJA-Starî zî tewrê merasîmî bîyî.
Fermandaranê YJA-Starî ra Gulçîne Umut merasîm de qisey kerd û ard ziwan ke PKK serkêşîya Rayberê Şarê Kurdî Abdullah Ocalanî de bi 6 kesan ronîyayo la ewro resayo bi mîlyonan kesan. Fermandare Gulçîne Umut vat: ''Xêrê paradîgmaya Rayber Apoyî ra ma ewro eşkenê vajê ke cuya azade ra ber cuyêka bîne qebul nêkenê.
Ma bi komelê têdûşt, azad û demokratîkî bawer kenê. Dişmeno ke tim vano PKK qedînayo, ma visnenê vîrê ci ke Kurdîstan û Rojhelatê Mîyanênî de heta ke zerrîyêke zî seba azadîye gulp bida nê koyan de vera faşîzmî xoverdayîşê ma do dewam bikero. Nê koyî qetî çok nêşorê erdî ro. Nê esasî ser o Roja Gandarbîyayîşî Rayber Apoyî, şarê kurdî û pêro hemrayanê ma rê fîraz ba.''
Qiseykerdişî ra dima bi desan gerîlayan sloganê “Bijî Serok Apo”, “Bê Serok jiyan nabe”, “Jin jiyan azadî” û “Bijî Partiya Karkerên Kurdistan” vatî. Fîrazkerdiş bi govendan qedîya.
