Merkezê Îrtîbatî û Çapemenîye yê HPGyî derheqê çalakîyanê gerîlayan û hêrişanê îşxalî yê dewleta tirke de eşkerayîye daye û nê pare kerdî:

Amed

''Hêzanê ma yê Hewayî yê Şehîde Delale şewa ke 18ê gulane pabeste 19ê gulane de vera Baregehê Jetî yê Bingeyênî yê 8. yê artêşa tirke yê Amedî têdima di çalakîyî kerdî. Çalakîya verêne de banê pîlotanê îşxalkeran û persenolanê hêzanê hewayî yê tirkî ame hedefgirewtene. Çalakîya dîyine de zî waro ke teyarayê şerî tede yê ame pirodayene. Netîceya nê çalakîyan de teqayîşê pîlî ameyî meydan la hûmara pîlotanê îşxalkeranê ke merdî zelal nêbîye.

Xakurkê

Herêma Xakurkê de 18ê gulane de vera îşxalkeran çalakîya sabotajî ameye kerdene. Wesayîtê tîpê Reoyî ke mabênê koyanê Kevortê û Lêlikanî de şîyêne hedef ame girewtene. Netîceya çalakîye de wesayît ame îmhakerdene û tewr tay 6 îşxalkerî ameyî cezakerdene. Na çalakî semedê yadkerdişê şehîdanê menga gulane ameye kerdene.

Metîna

18ê gulane de Qilê Azadî yê herêma Metîna de pê çekanê giranan vera îşxalkeran çalakîyêke ameye kerdene.  Çalakîye de 3 roketan îsabetê mewzîyanê dişmenî kerde la netîceya merde û birîndaran de zanayîş nêame girewtene. Badê na çalakîye qereqolanê sînorî ra dewê Dêşîşê û Seraro pê obusan ameyî bombardumankerdene. Nê hêrişan de bax û bexçeyanê şarî zirar dî.

Hêrişê hewayî

Artêşa tirke ya îşxalkere 19ê gulane de Qilê Zendûra yê herêma Metîna û warê Wexelê yê Avaşînî pê teyarayanê şerî, erazaîya Koordîne û Derarê yê herêma Metîna zî pê helîkopteranê Skorskyan bombarduman kerdî. Eynî roje Qilê Azadî yê Metîna û Qilê Şehîd Serxwebûnî yê Zapî de pê helîkopteranê Skorskyan leşkerî ameyî cakerdene. Reyna Qilê Şehîd Serxwebûnî û dewê Nêrwe û Kînyanînî  yê Zapî û warê Mareşoyî yê herêma Avaşînî  pê helîkopteran ameyî bombardumankerdene. Nê hêrişan de vînîbyayeyê ma çîn ê.''