Gerîlayan Zagros de Newroze pîroz kerde. Fermandarê HPG û YJA Starî zî tewrê pîrozkerdişan bîyî.

Pîrozkerdişê Newroze yê ke Zagrosan de ameyî kerdene bi merasimêk ke seba vîrameyîşê şehîdan ame viraştene dest pêkerdî.

Fermandaranê Qerargehê Merkezî yê Pawitişê Şarî ra Amed Malazgîrtî û fermandarê HPG û YJA Starî ra Hêzîl Ozgure, Zozan Rûkene, Axîn Cûdî, Sîpan Rojhilat û Aras Çatakî pîrozkerdişan de ca girewt.

Amed Malazgirto ke merasimî de gerîlayan rê xîtab kerd vat ke hêzê HPG û YJA Starî do bi pirodayîşanê bitesîran cewabê lazimî bidê artêşa Tirkî ya îşxalkare û vat, “Mîlîtanê PKK’yî qetî do qesasê merdimanê ma yê ameyê kiştene bigîrê.”

ADIRÊ NEWROZE ZINCÎRÊ KOLETÎYE ŞIKITÎ

Malazgîrtî vat, “Ma Newroza serra 2019’î sere de Rayber Apoyî, keyeyanê şehîdanê ma yê qehremanan, hemeyê şarê Kurdî û dostan rê pîroz kenê.  Heman wextî de ma roşanê Newroze yê Leyla Guvene, Nasir Yagizî û heme xoverdayoxanê ke kewtê grevê vêşanîye zî pîroz kenê.”

HEMVERÊ TECRÎDÎ DE DO XOVERDAYÎŞ BI SER BIKEWO

Malazgîrtî xoverdayîşê zîndanê Amedî ard vîrî û bale ante serê xoverdayîşanê grevê vêşanîye û nê vatî:

“Mucadeleyê azadîye yo ke serkewtişê ci hetê Mazlûman, Kemalan û Xeyrîyan ver bi serkewtişî ame berdene, ewro bi serkêşîya embazî Leyla Guvene û Nasir Yagizî bi grevanê vêşanîye yeno dewamkerdene. No xoverdayîş tena bi seba şarê Kurdistanî nêno kerdene, heman wextî de seba azadîya hemeyê şaranê Rojakewtena Mîyanêne serkêşî keno.  Tu hêz nêeşkeno nê îradeyî bin fîno. Her çend dinya xoverdayîşê azadîye yo ke bi serkêşîya PKK’yî yeno kerdene rê kor, ker û lal a zî heme şarê dinya na rastîye vînenê. Ma bawer kenê embazê ma yê ke bi fedakarî û cesaretêkê pîlî xo ver danê do bi ser bikewê.

No xoverdayîş do bibo wesîle ke tecrîdê serê Rayber Apoyî bêro wedaritene û şaro Kurd azad bibo. Çunke no xoverdayîş sewîyeyêka tewr berze de îradeyêk wazeno. Tu kesêk ke wayîrê îradeyêkê hende pîlî nêbo nêeşkeno bi çalakîyêka winayêne xo ver bido. La nê embazî nê çîyî kenê. Çîyo ke bi ser bikewo do îradeyê xoverdayoxanê grevê vêşanîye bo.”

DINYA ALEM DO BIVÎNO KE PKK DO SENÎ CEWAB BIDO

Malazgîrtî ard ziwan ke ê do hesabê zulmê serê şarê Kurdî bipersê û cewabo ke lazim o bidê îşxalkaran. Malazgîrtî wina qisey kerd: “Dewleta Tirkî ya îşxalkare pîya bi hukmatê AKP’yî û ekîpa ci seba ke PKK’yî biqedênê çi destê înan ra ame înan kerd la ê bi ser nêkewtî.

Rast o; 3-4 serrî yo bi bêperwatî û metodanê leyminan hemverê têgêrayîşê ma û Gerîlayê Azadîya Kurdistanî de hêrişan kena. La bi çalakîyanê embazanê ma yê bitesîran, na propagandaya leymine ya dewleta Tirkî veng vejêna. Rastî na ya.

Bi wezîrêkê bêkarakter, bêşexsîyet ke merdimîye dir eleqeyê ci nêmendo û sexteyî ke bi metodanê mafyatîkan xo rojdem de ramojneno, wazenê ke îradeyê şarê Kurdî çin bikerê.   Labelê dinya alem do bivîno kee mîlîtanê PKK’yî do cewabêkê senênî bidê îşxalkaran. Newroze amî; mîlîtanê PKK’yî bi heyecanê adirê gurî yê Newroze amadekarîyêka xurte ya pratîkî kenê.  Helbet sey heta ewroyî, tîya ra tepîya zî nê şorişgêrî do hesabê zulmo ke îşxalkarî şarê ma ser o kenê bipersê.

Nê şorişgêrî rind zanê ke hukmatê AKP’yî Şirnex de, Silopî de, Cizîre de senî ciwanê Kurdî şehîd kerdê, malê şarê ma talan kerdo, keyeyî binê tankan de rijnayê. Gerîlayê PKK’yî do çi rey nînan xo vîr ra nêkerê. Mîlîtananê PKK’yî soz dayo şehîdan û şarê xo; qetîyen do qesasê merdimanê ma yê ke ameyê qetlkerdene bêro girewtene.” 

GANÎ HENDÎ KURDISTAN DE KOLONYALÎZMÎ RÊ ZEMÎN NÊRO PÊŞKÊŞKERDENE

Malazgîrtî derheqê weçînitişanê cayîyan ê ke nizd benê de zî wina qisey kerd: “Weçinîtîşî benê nizd. Erdogan û ekîpa ci Kurdistan de bajar bi bajar gêrenê; qe şerm nêkeno, rîyê ci nêbeno sûr, vejênê vernîya Kurdistanijan înan ra rey wazeno. Nê, şarê ma peydemende û bêîrade vînenê. Rasta ci Kurdî xeta Rayberîye de, serkêşîya PKK’yî de 40 serrî mucadele da, bedelê pîlî dayî û destkewteyê pîlî fînayî dest. Hendî Kurdî resayê na sewîye ke bi îradeyê xo qerar bidê. Şaro Kurd do bi îradeyê xo yê azadî AKP’yî bin fîno. Ganî hendî çew zemîn pêşkêş nêkero ke Kurdistan de kolonyalîzm biciwîyo.”

ŞARO KURD DO BIBO SERFIRAZÊ NÊ ŞERÎ

Malazgîrtî peynîya qiseykerdişê xo de nê vatî: “Dost dişmen do bivîno ke netîceyê nê şerî de oyo ke serfiraz bibo do şaro Kurd bo. Ma bedel danê û ma do bidê labelê wa bêro zanayene ke êyê ke bi ser bikewê do mîlîtanê PKK’yî, şaro Kurd û Kurdistan bê. Tarîx do nê binûso. Koyê Zagrosan do serkêşîya serkewtişî bikerê. Roja girewtişê qesasî amîya. A roje ewro ya. Nê bingeyî de ma ancî sere de ya Rayber Apoyî, Newroza serra 2019’î ya şarê Kurdistanî, dostanê şarê ma, xoverdayoxanê ke zîndan, ko û deşte de xo ver danê û ya hemeyê hemrayanê xo pîroz kenê.”