Fermandarê Qerargehê Merkezê Pawitişê Şarî  û Endamê Komîteya Rayberdişî ya PKKyî Murat Karayilanî Yeni Ozgur Politika rê qisey kerd. 

Beşê diyînî yê roportajî ra tay qismê girîngî wina yê:

''DAÎŞ awanîyêka winayêne bi ke wextêkê kilmî de pîl bi û wehşetêko pîl kerd. DAÎŞ bi 800 kesan kewt Mûsil û mîyanê 24 saetan de şaristan vist destî. Hêzê ke wayîrê qerardarî, bawerî û performansê leşkerîyî nêbîyê nêeşkayêne verê DAÎŞî bigêrê. Coka DAÎŞî her ca de netîceyêke girewte. Teyna gerîlayê ke bi felsefeya Rayber Apoyî perwerde bîyê û wayîrê ruhê fedayî bîyê eşkayî DAÎŞî vindarnê.

Wexto ke DAÎŞî hêrişê Şingalî kerd, hêzê Iraqî û pêşmergeyî remayî. O çax yewina ma ya verêne ver bi Şingalî şîyêne. Gerîlayan hêverî şarê Şingalî koy de pawit. O çax hêzê Amerîka pê helîkopterî ameyî Koyê Şingalî. Înan dima gerîlayî şinasnayî agêrayî û destekêk zî nêda. Mûsil, Mexmûr û Kerkûk de zî hêverî gerîlayan vera DAÎŞî şer kerd. Yanî gerîlayan rolê katalîzorî kay kerd. 

Gerîlayan qetî verê DAÎŞî xo apey nêant. Kerkûk û Mexmûr de pêşmergeyan dî ke gerîlayî hê vera DAÎŞî şer kenê. Înan o çax pê bawer kerd ke merdim eşkeno vera DAÎŞî şer bikero. Bi nê hawayî nê cayan de pêşmergeyî agêrayî. Gerîlayan şerê vera DAÎŞî de cesaret da. 

Wexto ke DAÎŞî hêrişê Kobanê kerdbi, rewşa şaristanî xirab bîye. O çax Rayber Apoyî seba seferberîye veng da. Fermandarîya ma zî bire daye ke waranê Botan, Amed, Garzan û Erziromî ra gerîlayê tewr tecrubeyî şorê Kobanê. Bi nê hawayî 4 hezar gerîlayê ma şîyî Kobanê. Gerîlayan ra nêbîyêne Kobanê bin kewtêne. YPG û YPJyî tecrubeyanê gerîlayan reyde Kobanê pawite û DAÎŞ bin vist. A raşte Kobanê de îdeolojîya DAÎŞî ya tarîye û îdeolojîya  PKKyî şer kerd û îdeolojîya PKKyî ser kewte.

Xûlasa gerîlayanê azadîye yê Kurdîstanî bi perspektîfanê Rayberê Şarê Kurdî Abdullah Ocalanî merdimatîye belayêka pîle ra xelisnaya. Teyna ma ney hêzanê bînan zî vera DAÎŞî şer kerd. La şerê PKKyî cesaret da hêzanê bînan û serkêşîye kerde. PKKyî bi nê hawayî merdimatîye rê xizmetêko pîl kerd. Hetê bînî ra şarê kurdî û têgêrayîşê ma zî destkewteyê pîlî vistî destî. Gerîlayê ma yê ercîyayeyî şehîd bîyî. 

Gerîlayî esasê xo de hêzê xopawitişî yê. La xora nêeşkenê her ca de xo biresnê şarî. Coka ganî şarê ma, komelê ma her ca de, taxe de, keye de xopawitişî aver bero û wayîrê hêzê xopawitişî bibo. Kurdîstan de rêxistinîya xopawitişî stratejîk û zaf girîng a. Ganî şarê ma, cinî û ciwanê ma tim bieşkê xo bipawê. Mîsal taxe de polîtîkayê şerê taybetî yenê caardene, uca de wa çew pabeyê ê bînî nêbo. Şarê taxe xopawitişî bikero. Xora tewr zaf ciwan û cinîyî hedefê polîtîkayanê şerê taybetî de yê. Coka tewr zaf ê rêxistinîya xopawitişî de cabigêrê. 

Gerîlayanê azadîye yê Kurdîstanî mabênê 1984-2000î de modelê gerîlayanê Çîn û Vietnamî esas kerdêne. La bi taybetî wextê Komployê Mîyanneteweyîyî de nê modelî kêmasî û xeletîyî mojnayî. Dima gerîlayan hetê pratîk, takîk û metodan ra xo vurna. Xora gerîlatîya Kurdîstanî de tim xeta fedayîtîye mende bîye. La modelê artêşa gerîlayan a klasîke hînî nêno caardene.''