Merkezê Îrtîbatî û Çapemenîye yê HPGyî gerîlayanê ke Xelîfan de dafika PDKyî de şehîd bîyî ser o eşkerayîye daye.

Eşkerayîye wina ya:

''Ame qetîkerdene ke şewa 28-29ê tebaxe de komêka ma ya bi 7 gerîlayan wexto ke warê Qendîlî ra derbazê herêma Behdînanî bîyêne serê Awa Zapî de saete 02:30 de maruzê hêrişê hêzanê PDKyî bîya. Koma ma ya gerîlayan wexto ke Awa Zapî ra derbaz bîyêne hêzanê PDKyî verî ke hîşyarîye bikerê çar baskan ra pê çekanê giranan kome girewte binê gulevarnayîşî. Qetî bi ke nê hêriş de 5 embazê ma şehîd bîyî, bi îxtîmalêkî beno ke embazêkê ma esîr bîyo. Na kome ra embaz Hakîyî bi xo serebût dî û wextêkî ra dima weş û war cayê serebûtî ra agêra. Embaz Hakîyî xo resna hêzanê ma û hêrişê PDKyî xeylêk hetan ra kifş kerd.

Hêrişê hêzanê PDKyî wina qewimîyayo ke ma verî vatbi nê hêrişî wijdan, edalet û ercnayîşê şarê kurdî û rayaumûmîye rê verdenê. Serebût wina yo û şarê ma ganî pêro raştîyan bizano. No hêriş bê hîşyarkerdişêkî raşta raşte bi armancê îmhaya koma gerîlayan ameyo kerdene. Eşkera yo ke no zî semedo ke mabênê kurdan de pêkewtiş biqewimîyo bêro kerdene. Rixmo ke zanîyeno ke nê dewrî de pêkewtişê mabênê kurdan do pêro kurdan bin bikero no hêriş ame kerdene.

Nasnameyê ê embazanê ke maruzê hêrişê hêzanê PDKyî bîyî wina yê:

Nameyê Qodî: Tolhildane Raman Name û Peyname: Nesrîne Temir Cayê Bîyayîşî: Tirbespî Maye-Pî: Ayşana – Muhammed Şerîf

Nameyê Qodî: Şoreş Mardin Name û Peyname: Hakîm Acar Cayê Bîyayîşî: Mêrdîn Maye-Pî: Delale – Huseyîn

Nameyê Qodî: Axîne Muzirî Name û Peyname: Hacere Atabak Cayê Bîyayîşî: Colemêrg Maye-Pî: Havsete– Mustafa

Nameyê Qodî: Şoreş Colemêrg Name û Peyname: Suleyman Kaçar Cayê Bîyayîşî: Colemêrg Maye-Pî: Guluye – Şaban

Nameyê Qodî: Brûsk Munzur Name û Peyname: Yucel Kandemir Cayê Bîyayîşî: Erzirom Maye-Pî: Muhtebere– Enver

Nameyê Qodî: Serdem Cudî Name û Peyname: Yusuf Îbrahim Cayê Bîyayîşî: Dêrîk Maye-Pî: Fatma – Mihemed

Embaz Tolhildane Raman 1982 de şaristanê Qamişloyî yê Rojawanê Kurdîstanî de dadîya xo ra bîya. Embaze Tolhildane 15ê sibata 1999î de Komployê Mîyanneteweyî de bire daye ke tewra gerîlayan biba. Embaze Tolhildane cade xo aver berd, Hêzanê Taybetan de ca girewt û bi serran sey milîtanêka fedayîye û fermandare pêro wezîfeyê xo ardî ca. Dima ke xeylêk eyalatanê Herêmanê Pawitişî yê Medya de wezîfe kerd a 2014 de sey fermandare derbazê herêma Botanî bîye. Wextê hêrişanê DAÎŞî de reyna derbazê Rojawnaî bîye û têkoşînê serkewteyî ra dima agêraye koyan. Embaze Tolhildane zerrîya pêro şarê Rojawanî de cayê xo girewte, bîye mazhara heskerdişê înan. A prosesê serkewtişî yê Hemleya Wextê Azadîye de sey fermandarêke wexto ke derbazê cayê wezîfeyê xo yê neweyî bîyêke hetê hêzanê PDKyî ra ameye şehîdkerdene.

Embaz Şoreş Mardîn 1980 de dewa Bahwarî ya qezaya Mîdyadî ya Mêrdînî de dadîya xo ra bîyo. Embaz Şoreşî metropolanê Tirkîya de PKK şinasna, xebatan de ca girewt û 1997 de Eyaletê Dêrsimî de tewrê gerîlayan bi. O kedaya pîle ra dima bi fermandar, pratîkê 5 serran ra dima 2002 de derbazê Herêmanê Pawitişî yê Medya bi. Embaz Şoreşî 2006-2008 de Zagrosan de mesuldarîye girewte co mil, 2009 de derbazê Eyaletê Dêrsimî bi, 2010-2011 de Dengizê Sîyayî de pratîk kerd û 2013 de wextê xoapeyantişî de derbaê Herêmanê Pawitişî yê Medya bi. Embaz Şoreşî xoverdayîşê vera DAÎŞî de Rojawan de bi gazî, yew çimê xo vînî kerd la bi qerardarî têkoşînê xo rê dewam kerd. Embaz Şoreşî tedawî ra dima wexto ke derbazê Behdînanî bîyêne maruzê hêrişê PDKyî bi.

Embaze Axîne dewa Sapata ya Şemzînanî de dadîya xo ra bîya û cigêrayîşan ra dima aye bire daye ke tewra gerîlayan biba. Embaze Axîne tim xîret kerd ke esasê Îdeolojîya Xelisîyayîşê Cinîyan ser o biba gerîlayêka marîfetîne ya YJA-Starî coka akademîyan de dersî girewtî, dima zî sey pisporêke xeylêk embazê xo perwerde kerdî. Embaze Axîne pê nê tewirê xo yê îdeolojîkî tim bîye fermandarêka mîsale û marîfetîne ya YJA-Starî. Embaze Axîna ke waştêne pisporîya xo pê gerîlatîya dewrê neweyî pratîze bikera û bi nê hawayî vera artêşa tirke ya îşxalkere şer bikera pa 6 embazanê xo serê Awa Zapî de maruzê hêrişê hêzanê PDKyî bîye û şehîd bîye.

Embaz Şoreş Colemêrg qezaya Çelê de dadîya xo ra bîyo. Embaz Şoreş Colemêrgî ciwanîya xo de tewrê xebatanê têgêrayîşî bi û 2012 de wextê şerê giranî de tewrê gerîlayan bi. O cade cuya gerîlatîye musa û serra 2014î de ey perwerdeyê gerîlatîya profesyonele girewte. Embaz Şoreş Colemêrgî 7 serran xeylêk waranê Kurdîstanî de pratîk kerd. Ey nê pratîkê 9 serran de tecrubeyê pîlî vistî destî û netîceya nînan de bi fermandarêko marîfetîn. Embaz Şoreş Colemêrg bi armanco ke şerê vera dewleta tike de herêma Behdînanî de ca bigêro serê Awa Zapî de pa 6 embazanê xo dafika hêzanê PDKyî de şehîd bi.

Embaz Brûsk Munzur 1990 de dewa Alîkulekî ya qezaya Qereyazî ya Erziromî de dadîya xo ra bîyo. Dima ke birayê ey Alîşêr 2010 de tewrê gerîlayan bi û birayê ci yo bîn Mazlûm 2012 de Çelê de şehîd bi embaz Munzur pê tesîrê nînan tewrê gerîlayan bi. Embaz Alîşêr 6ê kanûna 2019î de qezaya Tutaxî ya Agirî de şehîd bi. Embaz Brûsk Munzur zî serra 2014î de tewrê gerîlayan bi. Embaz Brûskî wextê xoverdayîşê Şingalî yê vera DAÎŞî de tewr vernî de ca girewt, prosesê nê têkoşînî de bi giranî bi birîndar la tedawî ra dima agêra wezîfeyê xo ser. Wezîfeyê xo yê Şingalî ra dima ey Akademîya Weşîye ya Şehîd Mehmet Hayrî Durmuşî de perwerde dî û sey doktorî xizmet kerd. O bi doktor Brûsk, milîtanêko Apogîr û fermandarêko çêr. Embaz Brûskî waştêne tecrubeyanê xo vera kolonyalîzmê dewleta tirke bixebitno û rayraşîyayîşê serkewtişî yê gerîlayan pîl bikero. Embaz Brûsk wexto ke bi nê armancî derbazê herêma Behdînanî bîyêke pa 6 embazanê xo dafika hêzanê PDKyî de şehîd bi.

Embaz Serdem Cûdî şaristanê Dêrikî yê Rojawanê Kurdîstanî de dadîya xo ra bîyo. Embaz Serdem dima ke Şorişê Rojawanî de ca girewt tewrê gerîlayanê azadîya Kurdîstanî bi. Embaz Serdemî wextê hêrişanê DAÎŞî yê vera Başûrê Kurdîstanî de cepheyanê Mexmûr û Kerkûkî de ca girewt û mesuldarîya xo ya tarîxîye arde ca. Nê wezîfeyî ra dima o agêra koyanê Kurdîstanî û tewrê Hêzan ê Taybetan bi. Embaz Serdemî tim xîret kerd ke pêro wezîfe û mesuldarîyanê xo bîyaro ca. O tim bi milîtanêko mîsal, fedayî û aktîf. Embaz Serdem wexto ke pa 6 embazanê xo derbazê Behdînanî bîyêne maruzê hêrişê hêzanê PDKyî bi.

Sere de keyeyanê ercîyayeyan ê embazanê ma rê, şarê welatperwerî yê Rojawan, Şingal, Mexmûr-Kerkûk û pêro Kurdîstanî rê ma serweşîye wazenê.Ma venga şarê xo danê ke wayîrê çêranê tewr fedayî û marîfetînan vejîyê. Ma venga ciwananê kurdan danê ke têkoşînê nê embazan xo rê mîsal bigêrê û rayraşîyayîşê Kurdîstanê Azadî û Rayberîya Azade bi serkewtişî tacîdar bikerê.''