Gerîlayanê YJA Starî ra Avaşîn de da îşxalkaran ro

Gerîlayanê YJA Starî herêma Avaşînî de verba îşxalkaranê Tirkî çalakî viraşte.

Merkezê Îrtîbat û Çapemenîye yê HPG'yî eşkera kerd ke gerîlayanê YJA-Starî herêma Avaşîn de verba îşxalkaranê Tirkî çalakî viraşte.

Eşkerayîya HPG'yî de nê ameyî parekerdene: "Çarçeweya Hemle ya Şorişgêr a Şehîde Ronya û Şehîd Bagerî de hêzanê ma yê YJA-Starî 1'ê Teşrîna Verêne de verba artêşa Tirkî ya îşxalkare Tepê Xwedê yê herêma Avaşînî de  çalakîyêk viraşte. Hûmara leşkeranê merde û birîndaran ê çalakîye nêameye zelalkerdene.

Cûdî de Pêkewtiş

1'ê Teşrîna Verêne de hêzê ma wareyê Gundikremo yê Cûdî yê Şirnexî rastê yewîya artêşa Tirkî ya îşxalkere ameyî û pêkewtiş ame meydan. Dimayê pêkewtişî hêzanê îşxalkaran ware de operasyonêk da destpêkerdene. Her çiqas yewîyan dame ronayêne zî bîyê hedefê hêzanê ma. Hûmara leşkeranê merde û birîndaranê na çalakîye nêameye tesbîtkerdene. Nê operasyonî de di embazê ma şehîd bîyî. Nasnameyê embazanê ma yê ke şehîd bîyî do pey ra rayapêroyî dir bêrê parekerdene.

Şehîdê Çelê Ameye Yadkerdene

11’ê Êlule de minitqaya Şehîd Pilingî ya Çelê ya Colemêrgî de mabênê hêzanê ma  dişmenî pêkewtişî vejîyayî. Nê pêkewtişan de embaza ma Uveyş Berîtan şehîd bîye û embaza ma Kurdistan ( Gulîstan Erene) zî esîr kewte destê dişmenî. Şexsê keyeyê embaza Uveyşe de ma heme şarê Kurdistanî yê welatperwerî rê serweşîye wazenê, ma sond wanenê ke ma do beyraqa xoverdayîşî ya şehîdanê ma bi azadîye tacîdar bikerê.”

Nasnameyê gerîlaya ke şehîd bîye wina yo:

Nameyê Qodî: Uveyş Bêrîtane

Name Peyname: Menekşe Bakî

Cayê Bîyayîşî: Colemêrg

Maye-Pî: Baran – Mûhîttîn

Tarîx û Cayê Şehadetî: 11'ê Êlula 2019 / Çelê

Hêrişê Hewayî

2'ê Teşrîna Verêne de teyarayanê şerî yê artêşa Tirkî ya îşxalkare wareyê Goşinî û dormeyê dewa Şikeftan a Garî de û wareyê Saca yê Zapî yê Wareyanê Pawitişî  yê Medya bombardûman kerdî.