Gerîlayanê HPG û YJA Starî bi wesîleya serrgêra Komployê Mîyanneteweyîyî yê 15ê Sibate yê vera Rayberê Şarê Kurdî Abdullah Ocalanî ANFyî rê qisey kerd.

Dilxwaz Teyî: Komplo şexsê Rayberê Şarê Kurdî de vera şarê kurdî ame kerdene. Bi komployî ame waştene ke ziwan, kultur ê şarê kurdî û heqê ci yê sey kurdan ciwîyayîşî destê ci ra bêro girewtene û raştê qirkerdişî bêro. Semedê azadîya Rayber Apoyî xeylêk kesan ganê xo feda kerd ke çirey çîyo winayên nêame vînayene. Înan vat 'Şima nêeşkenê tîjê ma tarî bikerê.' Ma zî sey Gerîlayanê Azadîye yê Kurdîstanî Rayberê xo ra hêz genê û koyan de şer kenê. Çalakîyê demê peyênî zî îrade û bawerîya gerîlayan ramojnenê. Nê çalakîyan senî ke derbeyê pîlî dayî nişmenî ro vera xayînan zî bîyî cewab.

Mîlîtane Zagros: Hêzê hegemonîkî paradîgmaya Rayberê Şarê Kurdî ra tersenî. Fîkrê Rayberîye heme dinya ra vila bîyî. Komelî azadîya xo azadîya Rayberîye de vînenî. Ma sey mîlîtanê Rayberîye sozê xurtkerdişê têkoşînî danê. Çalakîyanê Herêmê Pawitişî yê Medya dişmen serûbin kerdo. Ma do destûr medê ke dişmen Kurdîstan de bireso armancê xo.

Derwêş Kaziwa: Rayberê Şarê Kurdî bi têkoşînê xo komplo betal kerd û îdeolojîya ey dinya ra vila bîye.  Gerîlayî zî her şertan de danê artêşa tirke ro. Kurdîstan ê dewleta tirke nîyo, leşkeranê xo semedê şerkerdişî şawenê Kurdîstanî. Ma do qet parçeyêkê Kurdîstanî zî medê dişmenî. Kurdîstan do bibo mezelê leşkeranê tirkan ke xora wina zî beno. Têna komplo şermezarkerdiş nêvejeno. Ganî destê kamî ra çi yeno bikero. Gerîlayî çalakîyanê xurtan kenê. Şerê şarî yê şorişgêrî de ganî şar û gerîlayî yewbînan temam bikerê.

Amed Başûrî: Dewleta tirke seba ke şarê ma Rayberîye ra bifîno dûrî tecrîd kena. Ma sey gerîla û şarî nê qebul nêkenê. Hemrayê ma zîndanan de grevê vêşanîye kenê. Kampanyaya ke têgêrayîşê ma daye destpêkerdene çend şino vila bena, xeylêk hetî semedê azadîya Rayberîya ma waran de yê. Gerîlayî zî koyan de çalakîyanê xurtan kenê. Ma semedê têkoşînî biîdîa û qerardar ê, qet hêzêk nêeşkeno ma Rayberîya ma ra dûrî bifîno.  Eke Rayber Apoyî ra xebere nêro girewtene, çalakîyê ma do bi tesîrê dahîna pîlî dewam bikerê.