Artêşa tirke pare dest pê hêrişê Girê Cûdîyî yê rojawanê Zapî kerd la netîceya xoverdayîşê gerîlayan de xo apey ant. Artêşa îşxalkere şewa 20-21î temmuze de reyna hêrişê herême kerd. Rojnamegere Dîlara Nûrhaq herême ra şerê Gerîlayanê Azadîye yê Kurdîstanî ANFyî rê ercnayî.

Rojnamegere Dîlara Nûrhaq ard ziwan ke hêzê gerîlayî bi taktîkanê şerî yê neweyan, bi hawayêkê bêmabênî derbanê giranan danê artêşa îşxalkere ro û vat: ''Operasyonî mengêne xo pey de verdaye. Artêşa tirke rixmê teknîkê xo zî nêeşkena planê îşxalî bîyara ca û derbanê gerîlayan ra neçare manena ke xo apey bianca. 

Dewleta tirke ya îşxalkere têgêrayîşê azadîye xo rê kerdo hedef. Dewleta tirke hol zanena ke heta ke PKK est bo a do nêeşka planê Mîsaki Mîllî bîyara ca. Dewleta tirke rê Girê Cûdîyî zaf girîng o.  Girê Cûdîyî xeta şaristananê Başûrî ser de cayêko sînor o û hîrêgoşeyê Metîna, Zap û Garê de yo.''

Nûrhaqe çimdarîyê xo yê serê şerê tebaxe wina pare kerdî: ''Şerê parînî de gerîlayan tecrubeyê pîlî vistî destî. Nika goreyê ney gerîlayî şer kenê. Tebaxe de gerîlayan derbêka pîle daye artêşa tirke ro. Vera artêşa tirke gerîlayî her roje çalakîyan kenê, bi taktîkanê neweyan, hêrişanê sekbanîye û koordîneyan çalakîyan kenê. Bi taybetî çalakîyanê YJA-Starî zaf zêde tê. Gerîlayê YJA-Starî nêverdenê ke leşkerêk zî çeperê xo ra vejîyo û têbigêro. Wexto ke leşkerî çeperan ra vejenê zî cade benê hedefê gerîlayan. Nika artêşa îşxalkere Girê Cûdîyî de teng mendo. 

Nika taktîkê gerîlayan o tewr girîng hêrişê bi pawitişî yê. Hêzê gerîlayan bi hêrişanê xo nêverdenê ke dişmen nefes bigêro. Nê şerî de gerîlayê tunelî û gerîlayê erazîyî yewbînan temam kenê. Bi taybetî gerîlayê YJA-Starî performanêkê girîngî mojnenê. 

Nê şerî de çîyêko balkêş o bîn zî no yo ke hêrişê gerîlayan, derbê vera helîkopteran hetê leşkeranê tirkan ra yenê parekerdene. No zî binkewtişê înan ê psîkolojîkî mojneno. Çalakîyê gerîlayan û netîceyê nê çalakîyan na raştîye eşkera kenê. Şer bi giranî dewam keno. Gerîlayî bi performanêkê pîlî û moralêkê zêdeyî şer kenê.''