Wezîrîya Karanê Zereyî yê Tirkî îda kerdbi ke gerîlayê HPGyî Abdulsattir Ozer qezaya Licê ya Amedî 14ê nîsane de pêkewtişêk de dinyaya xo bedilnaye. La dima ra vejîya werte ke Ozer 15ê nîsane de Nêweşxaneyê  Unîversîteya Dîcle de gerîyayo binê tedawî.

Ozero ke linga ci ra birîndar û darbê ci enfeksîyon girewt hema ke tedawîya ci temam nêbîyebî 28ê nîsane de pê sandalîyê bigogerî vejîya Edlîyeya Amedî. Ozero ke pê sîstemê SEGBÎS îfade da Serdozgerîya Komare ya Licê heqê xo yê hişkerdişî şuxulna. Dima ra mehkeme de zî no heqê xo şuxulna. Mehkeme qerarê tepiştişî da. Ozero ke erzîya zîndan eynî roje reyna ame berdene nêweşxane. Ozer 6ê gulane de bado ke rewşa ci biney bîye hole reyna ame berdene zîndan. Dîya zanayene ke Ozerî hema keyeyê xo nêdîyo.