Gerîlayanaê HPG û YJA Starî bale ante serê muhîmîya Roşanê Newroze û ard ziwan, Newroza 2019'î bi xoverdayîşêkê girdî yena pêşwazîkerdene.

Gerîlayê HPG'yî Bawer Munzurî destpêkê qiseykerdişê xo de şexsê Mazlûm Doganî de şehîdê şorişî û yê Newroze ardî vîrî û da zanayene, Newroza emserî Newrozêka normale nîya.

Munzurî bale ante serê xoverdayîşê girdî yê bi rayberîya Leyla Guvene û vat, “Ma heme hevalanê ke grevê vêşanîye de yê silam kenê û Newroza Serek Apoyî û şarê ma pîroz kenê. Newroze seba ma azadîye, haştîye û way û biratîya şaran a. Newroze wayîrê muhîmîya tarîxkî ya. Zulmo ke şexsê Dehaqan de Rojkewtena Mîyanêne de şaran rê ameyo kerdene hetê Kawayî ra ame qedênayene. Coka a roje ra nata Newroze her serre yena pîrozkerdene.

Ewro zî şexsê hemdem Mazlum Doganî de Newroze bîya wayîrê manaya hîratire. Ma; gerîlayê HPG û YJA Starî bi ruhê xoverdayîşê Mazlûm Doganî ma do tecrîdkerdişê Rayberê xo wedarê. Xoverdayîşê grevê vêşanîye yo ke bi rayberîya Leyla Guvene her cayê dinya ra vila beno reyêna silam kenê.”

ROŞANÊ NEWROZE TARÎ RA DERBAZÊ ROJÊKA NEWEYE BÎYAYÎŞ O

Gerîlaya YJA Starî Hêvîdar Şîyare ard vîrî ke 7 hezar ra zêdeyî girewteyî zîndanan de xoverdayîş de yê û ard ziwan, ê hêzêkê girdî xoverdayîşî ra gênê. Hêvîdar Şîyare ard ziwan, xoverdayoxê girewteyî serê rêça Mazlûm Dogan, Kemal Pîr, Sankîne Cansize de yê û vat, “Xoverdayîşê înan seba ma, seba şarê ma vengdayîşêko gird o. Ganî ma nika ra nê xoverdayîşî gird bikerê. Şarê Kurdî şarêko zaf xoverdayox o. Serê rêça Mehmet Tunçan û serê rêça Bêrîvanan de yo. Bi wesîleya Newroze ma xoverdayîşî bi serkewtişî tacîdar bikerê.”

Gerîlayê HPG'yî Dijwar Garzanî zî bale ante serê xoverdayîşê vera zaliman û vat, “ Şexsê Mazlûm Doganî de têkoşînê azadîye yê Kurdan nika xo resnayo bi mîlyonan. Adetê Newroze Mazlûm Doganî reyde bi wayîrê manayêka cîyaye, Rahşan Demîrele, Zekîye Alkane û bi desan ciwanan no da dewamkerdene. Nika zî zîndanan de, bajaran de, koyan de bi hezaran merdimî nê xoverdayîşî dewam kenê.”

Bi rayberîya Leyla Guvene û Nasir Yagizî bi hezaran merdimî vera neheqîye, bêedaletîye, esîrîye û tecrîdî xo ver ro danê. O yo ke ma ra yeno waştene, nê xoverdayîşî rê cewabbîyayîş o. Roşanê Newroze tarî ra derbazê rojêka neweye bîyayîş o.  Seba ma mengê Adare û Nîsane mengê xoverdayîşî yê. Ma reyêna Newroza Rayber Apoyî, keyeyanê şehîdan û şarê xo pîroz kenê.”