Endamê Kongreya Neteweyî ya Kurdîstanî (KNK) Xalîd Qadîrî derheqê hêrişanê îşxalî yê dewleta tirke yê ke Başûrê Kurdîstanî de vera herêmanê gerîlayan yenê kedene û xoverdayîşê gerîlayan de qisey kerd.

Xalîd Qadîrî dişmenîya dewleta tirke ya vera kurdan vist vîrî û vat: ''Dewleta tirke wazena heme destkewteyanê kurdan destê înan ra bigîro. Tirkîya têna dişmena partîyêke nê dişmena heme kurdan a. Hêrişê dewleta tirke narey tehlukeyanê dahîna pîlan vejenê werte. Înan verî zî zaf rey hêriş kerd la narey rîsk dahîna pîl o. Dewleta tirke wazena cayanê stretejîkan ê Kurdîstanî de baregehanê xo virazo û pirdanê mabenê leteyanê kurdan werte ra wedaro. Armancê înan oyo ke têkoşînî kurdan bişikno û bandura xo înan rê bikero ferz. Nayî ra ganî şarê kurdî goreyê na raştîya dewleta tirke tewir bigîro û vera ci vejîyo.''

Qadîrî bale ante xoverdayîşê gerîlayanê azadîye yê Kurdîstanî ser û wina dewam kerd: ''Gerîlayî nika vera hêrişê îşxalî bi hewayêkê fedayîyî xover danê û hêrişê înan pûç vejenê. Nê semedî ra do serkewtiş ê gerîla û şarê kurdî bo. La ganî nê prosesî de şar falîyetanê hîna xurtan rayra bero. Ganî heme rêxisitin û sazgehê sîvîlî yê kurdan vera hêrişê îşxalî yê dewleta tirke tewirê xo ramojnê û wirzê payan ser. Têna xoverdayîşê gerîlayan nêvejeno. Ganî vera hêrişan yew bloko xurt bêro raameyene. Şar ganî zafêr aktîf bo û vera îşxalî rayapêroyîye bêro raameyene.Dişmen bi heme îmkananê xo hêriş keno ke anor û destkewteyanê kurdan çîn bikero. Dewleta tirke wazena kurdan biverdo yewbînan. Serranê verênan de zî cehd kerdêne ke mabênê kurdan de şerê wayûbiratî vejo. Bi cehdkerdişê Kongreya Neteweyîye ya Kurdîstnaî no hedefê înan pûç ame vetene.''

Endamê KNKyî Xalîd Qadîrî vat: ''Tay hetî vanê 'dewleta tirke têna dişmenîya PKKyî kena' la şar zano ke no raşt nîyo. Şar nêrazîbîyayîşê xo kuçayan de ramojneno. Şarê ma vera hêrişê îşxalî îradeyê xo ramojneno la çi heyf ke hema tay hetê sîyasîyî na merhele de nîyê. Na nûqta de ganî tewirê partîyanê sîyasîyan hempar bo. Dewleta tirke têna vera yew partî nîya, waştişê ci îşxalkerdişê Kurdîstanî yo. Dewleta tirke dişmenîya vera kurdan de rêza verêne de ya. Coka ganî heme partîyê sîyasîyî yê kurdan hesabanê wurdîyan caverdî û  semedê destkewteyanê neteweyîyan vera nê hêrişan bibê yew.  Wezîrê Karanê Teberî yê Tirkîya eşkera kerd ke ê do Zap, Metîna û Avaşîn de baregehanê leşkerîyan ronê. Tirkîya ça de biwazo baregehan ronê wazena uca îşxal bikero. Tirkîya Kurdîstanî sey herra xo vînena û wazena îşxal bikero.''