Qezaya Geverî ya Colemêrgî de polîsanê ke aşma ravîyartî de eşt keyeyê Ozçukî ser heme keyeyî rê îşkence kerd û reyna mojna ke îşkence qereqolî ra vejîyayo, her hetî ra vila bîyo.

Polîsanê tirkan taxa Kişla de eşt keyeyê Ozçukî ser. Polîsan berî şikitî û Bariş Ozçuko ke rakewte bi ci rê îşkence kerd. Polîsan Ozçuk kerd rût û balkon de awa serdine kerd piro. Ozçuk qîra û  der û dorî ra hetkarî waşte. Babîyê ci Nadir Ozçukî seba ke lajê xo bixelisno polîsan reyde pêrodayîş kerd. Polîsan babî Nadîr û dayîke Saliha Ozçuke rê zî îşkence kerd. Saliha Ozcuka ke polîsan eşt payan ver, mîyanê gonî de mende.

Hatîce Ozçuka ke o wext ameye keye vînena ke Bariş Ozçuk bine dêsî de rût rêcifyeno. Dima ra Bariş Ozçuk bi wesayîtê zirxînî ame berdene Mudirîya Polîsan a Yuksekovayî. Ozçuk wesayît de zî yeno derbkerdene. Polîsî tifing kerd fekê ey û tehdît kerd. Ozçuk saetanê nêmroje de ame berdene nêweşxane û tîya raporê darbe ame girewtene.

Raporo ke keyeyî girewto xora mojeno senî îşkence ameyo kerdene. Avûkatan waşt wa polîsê îşkencekerî bêrê tesbîtkerdene û vat îşkence bi raporê nêweşxaneyî ameyo tesbîtkerdene. Avûkatan proseso huqûqî da destpêkerdene. Bariş Ozçuk nezdi yew aşme yo zîndan de yo.