Dewa Asgirekî ya qezaya Pilemurîye ya Dêrsimî de Gola Buyere pê rindîya xo her kesî heyran kena. Gola kretare nameyê xo pîranê cinîyan ra yew Buyere ra gêna û sey zîyaretgeh zî zanîyena.

Gola Buyere kişte de şikefteyêk zî est o. Şar şikefte de findan visneno ta, çirayan tavisneno û dûayan keno. Goreyê vatişan wextê Terteleyê Dêrsimî de zaf merdiman xo nê şikefteyî de nimito û xelisîyayê.

Dormeyê Gola Buyere de xeylêk nebatê endemîkî est ê. La sîrkulasyonê zêdeyî yê heywanan ra nebatî binê tehlukeyê vînîbîyayîşî de yê.

Serekê Merkezê Cigêrayîşanê Dêrsimî (DAM) Selman Yeşîlgozî dîmenê texrîbatê vera gole girewtî û vat: ''Gola Buyere sey Ana Buyere zî pênase bena la nê rojan de tay kesî tira vanê 'Baba Buyere.' Gola Buyere cayêko girîng û her serre bi hezaran kesî tîya zîyaret kenê. Nika na herême de wareyî est ê û sîrkulasyonê zêdeyî yê heywanan ra nebatî zerarêkê pîlî vînenê. Dêrsim de cayê winasênî ganî cade bigêrîyê binê pawitişî. Nêbo destê ma de çîyêk nêmano.''