Fermandaranê Hemleya Şorişgêre ya Bazanê Zagrosî ra Gulane Avaşîn derheqê hêrişanê îşxalî û xoverdayîşê gerîlayan de ANFyî rê qisey kerd.

Qiseykerdişê Gulane ra beşêk wina yo:

"Şerê Zendûra û Zapî yê 2021î şerêko normal nêbi. Nika zî Zap de vera artêşa îşxalkere xoverdayîşêk est o. Ma xoverdayîşî ra ber rayîrêkî qebûl nêkenê û bi nê hawayî têkoşîn kenê. Nika Zap de heta  Çiyareş, Kurojahro, Şikefta Birîndara û Werxelê şerêko giran est o. Embazê ma bi aqlê hemparî têgêrenê û tena serkewtiş qebûl kenê. Seba ma çîyo tewr girîng azadîya Rayberê ma ya. Ma zanenê ke no şer do zaf çîyan dîyar bikero. Aqibetê nê şerî do nêzdîbîyayîşê bi Rayberîye bivurno coka ma bi baldarî têgêrenê.

Dewleta tirke tay cayan de nêeşkena kişteyanê xo zî bigêra. Warê Kevirê Kunê yê Şikefta Birîndaran de bi rojan o bi desan cenazayê înan est ê. Na rewşa dewlete eşkera kena. Embazê ma bêteredut şînê serê dişmenî. Gerîlayî pê taktîk, metod û îradeyê xo heqê teknîkê dişmenî ra yenê. Dişmen nêeşka pê Skorskyan leşkeran bîyaro war coka pê hemkarîya tay kesan leşkerî ardî Kuro Jahro. Tîya embazê ma dişmenî rê kenê cehenem. Reyna warê Şehîd Şemdînî de dişmen nêeşka yew metre aver şo. Têna yew tîma gerîlayan vera dişmenî xo ver da û nêverda dişmen nefes bigêro.

Tay xayînan ra nêbîyêne dişmen nêeşkayêne aver şoro. Ma amade yê ke nê şerî de pêro bedelan bidê. Ma do meverdê ke dewleta tirke erdê ma de bimana. Ma venga ê qoricîyanê Vakurî danê ke şerm o ke înan xo seba panc qûrûşan roto. Dişmen hêrişanê xo de verî înan şaweno verê ma. Na bêrûmetîyêka pîl a.

Dewleta tirke nê şerî de hetê psîkolojî ra bin kewta. Wa şarê ma girîngîya nê prosesî hol fam bikero û hetê gerîlayan de cabigêro. Wa wayîrê gerîlayan vejîyo. Şer nika bi giranî dewam keno la no şer do bibo giranêr. Madem ameyê tîya do bivînê ke tîya cayêko senîn o. Ê do bi hawayêkê pîlî bişikîyê."