Gulîstane Doku 5ê çeleyî ra nata vînbîyaye ya. Gulîstane tewr peyêne Awbendê Uzunçayirî de amebî dîyene la xebata cigêrayîşî ya binê awbendî zî 18ê tebaxe de ameye vindartene. Waka Gulîstane Aygule Doku medyaya komelkîye de derheqê xebetanê cigêrayîşî de qisey kerd û îfade kerd ke rixmo ke raporê pisporê tehqîqatî de zî pêro delîlî Abakarov nîşan kenê reyna zî o nêno hukmkerdene.

Aygule Doku bale ante mesajanê Abakarovî ser û vat: ''Gulîstane şewa 5ê çeleyî de saete 00:30 de Zaynal Abakarovî rê mesajêk erşawena û vana 'Tersena.' Zaynal Abakarov zî ci rê wina yew mesaj erşaweno 'Ti heta ke naye bikere mi reyde qisey mekere.' Seba çita wina vano? Çewî cewabê naye nêdayo ma. A roje ê keyeyî de qala çita ameye kerdene ke Zaynal Gulîstane rê mesaj erşaweno û vano 'Hele menda ke rîyê to ra planê dadîya mi bixeripîyê, keye de çîyo xirab bi.' Gulîstane bîye şahîda çita? Nê mesajî pêro kişf û qeytkerde yê. Gulîstane a şewe ê keyeyî de nişena ro û serê sibayî ê lajekî ra bena cîya. Raporê pisporî de vano ke Zaynalî Gulîstane rê gef wend û ci rê şîdet kerd. La hema zî Zaynal nêno hukmkerdene, çira?

Ma nêgêrenê kiştoxêk ma gêrenê waya xo. Ma 220 rojan vat ke kênaya ma xo nêkişena. Ma 220 rojan verê awbendî de pawitêne la tira cenaza nêvejîyaye. Ma venê wa Zaynal bêro hukmkerdene vanê delîl çin o. La ma o çax Gulîstane senî yena dîyayene?''