Bi fermanê Wezîrîya Karanê Zereyî 14ê teşrîna peyêne de şaredarîyê Mêrdîn, Êlih û Xalfetî yê DEM Partî ameybî destsernayene.  Şarê Êlihî serkêşîya cinî û ciwanan de wayîrê îradeyê xo vejîyeno. Hemşaredara Êlihî Gulîstane Sonuk derheqê babete de ajansê ma rê qisey kerd.

Gulîstane îfade kerd ke dima ke şaredarîye hetê polîsan ra gêrîyaya binê ablûqa ê musayê ke şaredarîye ameya xespkerdene. Gulîstane vat: ''Ma waşt bikewê zereyî la destûr nêdîya. Têkoşîn û wayîrvejîyayîşê şarî yo bêhempa est ê.Hûmara ma her ke şina zêdîyena. Ma tîya de yê. Heta ke bira qeyûmî ya ke îradeyê şarê ma çin hesibnena bêra betalkerdene, şarê xo reyde ma do têkoşîn bikerê.''

Gulîstane dîyar kerd ke ê do vera ê kesanê ke îradeyê şarê kurdî çin hesibnenê têkoşînî ra fek vera nêdê û vat: ''Şaredarîye yê şarî ya. Senî ke ma prosesê weçînayîşan de ma bi ruhê seferberî têgêrayî ancî ma do wina têkoşîn bikerê. Ez bi taybetî venga cinîyanê dinya dana ke bêrê ma pîya îradeyê xo bipawê. 

Ez venga pêro hêzanê çepgîran, demokratan û sosyalîstan zî dana ke na şaredarîye yê şima ya zî. Tayînkerdişê qeyûman xîretê çinkerdişê haştî, yewî û demokrasîyî yo. Ma eşkenê pîya xo ver bidê, hêvîya haştî û azadîye bipawê. Bêrê vera qeyûman ma pîya têkoşîn bikerê.''