Çalakîya hemsereka KCD’yî û parlamentera HDP’yî ya Colemêrgî Leyla Guvene roja xo ya 100. de ya. Guvene roja 100. de Jinnews rê qisey kerd.

Guvene bale ante bêvêngîya vera tecrîdî ser û va: ‘‘100 rojî yo ez û 60 rojî yo zî zîndanan de tepişteyî xover danê.  Rewşa nê tecrîdî hinî heme welat de vila bîya. Birêz Ocalan 20 serrî yo binê tecrîdî de xover dano. Çîyo wînayên hema nêameyo dîyayêne. Çalakîya ma no tecrîd binê arde rojdem. 100 rojî yo ez xover dana. Ez bi na çalakîye musaya ke merdim bi hêzê mezgê xo mucîzeyêk o. Mi bi na çalakîye bedênê xo da mergî ver û mezgê mi zî hukmê mi kerd. Ez vera na bêhuqûqîye xover dana. Coka vîjdanê mi rehet o û hûzûrê mi esto. Heta ke ez destur medî do bedenê mi îflas meko. Heta ke ez xover bide bedenê mi zî do xover bido.

 ÊYÊ KE BÊVÊNGÊ DO MI BIMIRNÊ!

La êyê ke vera na çalakîye bêvêng ê, mirnenê. Na çalakî semedê komelî îmtîhanêk o. Ê ke no îmtîhan de bimanê siba do meeşke vajî ma heq huqûq pawenê. Eke cinîyan çîyêk ra bawer kerd, qet çew nêeşkeno înan rayîrê ci ra açarno. Bêşik o ke ez zî wazena biciwîye û ameyîşê aşitîye bivînî. La eke semedê naye bedel hewce keno, ez cade dana. Nê semedî ra ez bi bawerîya girde dewam kena. Xoverdayîşê zîndandanan  ke rayberîya cinîyan de yeno domnayene qûwet dano mi. Esasî de ê  ke teber de xoverdayîş ca verdayo, ê binê tecrîdî de yê. Ya benî azad ya  zî qet.‘‘