Wekîla HDPyî ya Şirnexî Nurane Îmîr derheqê dewaya qefilnayîşê HDPyî de ANFyî rê qisey kerd.

Îmîre îfade kerd ke AKP 2015î ra nata vera HDPyî plananê fatisnayîşî ano ca û vat: ''17ê adare de dest nîya wekilîya Omer Faruk Gergerlîogluyî ser û derheqê partîya ma de dewaya qefilnayîşî ameye akerdene. Na bire seba kongreya MHPyî AKPyî ra dîyarîyêke bîye. Ê wazenê têgêrayîşê sîyasî yê kurdan tasfîye bikerê. La HDPyî wayîrê tradîsyonêkê 40 serrî yo û rayîrê nê sîyasetî do nêro birnayene. AKP û MHP dişmenîya vera kurdan ser o estbîyayîşê xo danê dewamkerdene. AKP hînî nêeşkeno welat îdare bikero û heta ke meseleya kurdan çareser nêba Tirkîya de qet yew mesele û krîz çareser nêbenê.''

Îmîre ard ziwan ke îqtîdar pê nîqaşê HDPyî wazeno meseleyanê esasan mîyan bikero û vat: ''La nê hêrişê vera HDPyî do nêeşkê emrê AKP-MHPyî derg bikerê. Operasyonê Garê ra dima şeklê sîyasetê Tirkîya vurîyayo. Ewro pêro muxalîfê îqtîdarî sey 'terorîst' pênase benê. Îqtîdar HDPyî reyde hêrişê pêro partî û muxalîfan keno. Ma huqûq, edalet û azadîye pawenê. No sîstem şar keno qurbanê menfaatanê xo. Ma raştîya şarî pawenê û vanê 'eke şar çinbo welat zî çinbo û eke welat çinbo îdare zî çinbo.' HDP partîya şaran a û şaran rê xizmet kena.''

Îmîre eşkera kerd ke HDP wayîrê wayîrê tradîsyonêkê tarîxî û tecrubeyê 40 serrî yo û wina dewam kerd: ''40 serrî yo na hîşmendî vera sîyasetê kurdan dişmenîye kena û partîyanê kurdan qefilnena. Ê têna eşkenê tabela û bînaya HDPyî biqefilnê. Weçinîtoxê ma do reyna wayîrê tradîsyonê ma yê tarîxî vejîyê. HDPyî seba pêro senaryoyan xo amade kerdo.''