Partîya Şaran a Demokratîke (HDP) Dara Hênî de buroyê weçînayîşî akerd. Namzedê Hemşaredarîya Çewlîgî Hîşyar Ozsoy, Parlamenterê HDP’yî yê Çewlîgî Erdal Aydemîr û Namzedê Hemşaredarîya Dara Hênî Sadullah Urkun ve Şefîka Dogane beşdarê akerdişî buroyê weçînayîşî bîyî.

ÎQTÎDARÊ AKP’YÎ ÎQTÎDARÊ KRÎZÎ YO

Akerdişê buroyî ra ver Erdal Aydemîrî qisey kerd û seba eleqa û paştdayîşî şarê rê sipas kerd. Aydemîrî ard ziwan ke ê seba weçînayîşanê cayîyan ê 31'ê Adare heme endamanê xo reyde xebatanê xo dewam kenê û vat, “No 17 serrî yo teyna îqtîdarê AKP’yî welatî îdarê keno. Wexto ke ameyî zî heme rastîyê xo nê bîyî: ‘seba ke welat hîna baş bo ma teyna bikerê îqtîdar. Wa eknomî û demokrasîyê nê welatî raşt bo, haştîye û edalet bêro nê welatî.’ Nê çîyan ser o zaf propagandayî kerdî. Heme şaranê Tirkîya seba ke AKP teyna bêro îqtîdar paşte daye ci. 16 serrî ra dima welat kerdo çi hal raste de yo. Krîzê ekonomî, bêkarîya girde. Nêzdîyê 9 mîlyon merdimî bêkar ê. Zaf eşkera yo ke berpirsîyarê nê heme çîyan îqtîdarê AKP’yî bi xo yo.”

MA  DO ZIWAN Û ŞAREDARÎYA TÊDUŞTE PÊŞKÊŞ BIKERÊ

Namzedê Hemşaredarîya Dara Hênî Sadullah Urkun û Şefîka vat, “Ma do Dara Hênî de bi ferasetêkê neweyî yê şaredarîye her kesî rê eynî mesafe de, edîl û têduşt de xizmet biderê.”

OZSOY: ŞÎYAYÎŞÊ EKOMOMÎ WEÇÎNAYÎŞÎ RA DIMA BAŞ NÊASENO

Namzedê Hemşaredarîya Çewlîgî Hîşyar Ozsoyî zî qiseykerdişê xo de bale ante serê ekonomî, vat “Rewşa ekonomî rind nêasena, weçînayîşî ra dima verê welatî de rojê zorî estê. Dowîz do berz bibo, esnaf dikanan pa bido. AKP’yî welat rind ant zereyê hezoke. AKP’yo ke haştîya zereyî hal nêkerda, teber de Tirkîya kerde bêîtîbare. Bawerîya kesî bi ekonomî nêmende, zaf kardarî derbazê hemwelatijîya welatanê bînan bîyî.  Şîyayîşê ekomomî weçînayîşî ra dima baş nêaseno.

Akerdişê buroyê weçînayîşî kaykerdişê govendan ra dima qedîya.