Hemsereka KCDyî û parlamentera HDPyî ya Colemêrgî Leyla Guvene hemverê tecrîdkerdişê Rayberê Şarê Kurdî Abdullah Ocalanî de 76 rojî yo grevê vêşanîye yê bêdem û bêagêrayîşî de ya. Grevê vêşanîye yo bêdem û bêagêrayîş yê tepişteyanê bînan zî roja xo ya 38ine de yo. Tewr tay 250 tepişteyî bi heman waştişî grevê vêşanîye de yê. Bi heman amacî Herêma Kurdistanî a Federale de bajarê Hewlêrî de, bajarê Strasbourgî yê Fransa de û bajarê Gallerî yê Şahanşahîya Yewbîyayî de grevê vêşanîye yê bêdem û bêagêrayîşî dewam kenê.

Parlamenterê HDPyî yê Amedî Mûsa Farîsogullariyî derheqê çalakîyanê grevanê vêşanîye yê hemverê tecrîdkerdişê Rayberê Şarê Kurdî Abdullah Ocalanî ke bi serkêşîya hemsereka KCDyî Leyla Guvene de virazênê de qisey kerd. 

 ‘HALÊ GUVENE KRÎTÎK O’

Farîsogullariyî vist vîrî ke çalakîya hemsereka KCDyî Leyla Guvene resayo merheleyêka krîtîke û wina qisey kerd: “Çalakîya birêze Guvene roja 76ine de ya û halê aye yê weşîye resayo merheleyêka krîtîke. Birêze Guvene 10 kîloyî ra vêşêr dayo û nêeşkena bi hawayêkê asanî awe bişimo. Hetê bînî ra hêzî ra kewta rixmê nê de zî bi ruhê xoverdayîşî çalakîya xo domnena. Îdarekarê AKP, CPT, Mehkemeya Heqanê Merdiman a Ewropa û sazîyanê edaletî yê mîyanneteweyîyan bêveng ê. Na bêvengîye nêna qebûlkerdene. Seba ke rayapêroyîye û cimat hemverê tecrîdî de bêveng mendo Guvene û tepişteyan dest bi grevê vêşanîye ya bêdem û bêagêrayîşî kerdo û bi na çalakîye rayapêroyîye û cimat haya kerdê.” 

 ‘WAZENÊ TÊKILÎYA OCALANÎ CIMATÎ RA BIVISNÊ’

Farîsogullariyî bale ante tecrîdê Ocalanî û israrê AKPyî yê tecrîdî ser û wina dewam kerd: “Bi tecrîdê Îmraliyî wazenê vernîya rayîrê fikranê Ocalanî bigîrê û bi nê hawayî têkilîya Ocalanî cimatî dir bêro birnayene. Bêvengîya hemverê tecrîdkerdişê Ocalanî dewamê komploye yo û rejimo faşîst yê AKP-MHPyî hêzê xo hêzanê mîyanneteweyîyan, CPT û Mehkemeya Heqanê Merdiman ê Ewropa ra gêno û tecrîdî hîna keno giran. Seba ke tecrîd biqedîyo çalakîya birêze Guvene roja xo ya 76ine de, ya endamê meclîsê HDPyî Nasir Yagizî roja xo ya 65ine de û ya Strasbourgî zî roja xo ya 36ine de ya. Goreyê hayîdarîyanê ke ma Hewlêr ra gênê halê embaz Nasir Yagizî zî krîtîk o. Waştişê embazanê ma bewlî yê û waştişê înan meşrû yê. Ganî tecrîd bêro wedartene.”

 ‘METODÊ ŞERÊ TAYBETÎ YO’

Farisogullariyî derheqê pêvînayîşê Mehmet Ocalanî yê Rayberê Şarê Kurdî Abdullah Ocalanî de zî vat: “Seba ke vernîya grevanê vêşanîye yê ke her cayan de vila benê bêro girewtene no pêvînayîş ame viraştene. Ganî no sey metodêkê şerê taybetî bêro dîyene. Naye ra înan tavilî Mehmet Ocalanî seba pêvînayîşî şirawit Îmrali. No zî ramojneno ke no seba wedartişê tecrîdî nêbîyo. Amaco sereke ke vernîgirewtişê xoverdayîşî yo ke her ke şîyêne vila bîyêne bi.”

‘VERÊ BERÊ ZÎNDANÎ DE ÇALAKÎYA NOBETE’

Farisogullariyî ard ziwan ke 27ê Çile de bi tewrbîyayîşê parlamenteranê HDPyî do verê Zîndanê Tîpê Eyî yê Amedî de dest bi çalakîya nobete bikerê û vat: “Seba ke ma qîrayîşê tepişteyan rê bibê veng ma do 27ê Çile de bi nameyê parlamenteranê HDPyî verê berê zîndanî de dest bi çalakîya nobete bikerê. Heta çalakîyê zîndanan dewam bikerê ma do zî mîyanê têgêrayîşî de bê. Ma do bi çalakîyanê xo veng bidê vengê çalakwananê zîndanan. Bêvengî merg o û ganî her kes bibo vengê nê qîrayîşî.”

Farisogullariyî peynîya qiseykerdişê xo de vat eke şehadetêk virazîyo do mesuldarê na yewe reijmo faşîst ê AKP-MHPyî bo.