Emîne Şenyaşara ke mêrde û lajê ci hetê pawitoxanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde verê Edlîyeya Riha de nobeta edaletî rê dewam kena. Nobeta keyeyî roja 37. de dewam kena.

Ewro kênaya dayîke Emîne Perîhane Yuzuguldu zî tewra nobete bîye. Keyeyê Şenyaşarî serê sibayî rew ame û dest pê nobete kerd. Keyeyî hemwelatî û avûkatanê ke şîyêne edlîye rê qala qirkerdişî kerde.

Wekîlê HDPyî yê Dîlokî Mahmut Togrulî, Rêxistina HDPyî ya Dîlokî û Rêxistina DBPyî ya Dîlokî ewro keyeyê Şenyaşarî nobeta edaletî de zîyaret kerd.

Dayîke Emîne ard ziwan ke rixmo ke roje gêna nêeşkena keye de ronişa û vat: ''Ez vana beno ke ê vajê 'menga ramazan a', pê ma zerrîya înan dejenê û lajê mi vera danê. Ceza dîyaye lajê mi la kiştoxanê lajanê mi rê ceza nêdîyaye. Çira dîmenê nêweşxaneyî nênê eşkerakerdene?''

Perîhane Yuzuguldu zî pare kerd ke kiştoxî yenê nimitene û keyeyê Şenyaşarî têna edalet wazeno.

Wekîl Mahmut Togrulî da zanayene ke ê hetê keyeyê Şenyaşarî de yê û vat: ''Verê çimanê her kesî de qirkerdişêk ame kerdene.Qeydê nêweşxaneyî de her çi asneo. Rixmo ke dozgerî vat '32 kesî ameyî tesbîtkerdene' dewa nêna akerdene. No edalet nîyo huqûqê serdestan o. Pê hêz û nufuzî akerdişê dewaya nêweşxaneyî yeno astengkerdene. Ewro roja 2. ya menga Remezanî ya. Vizêr dayîke Emîne verê edlîye de rojeyê xo akerd. Bînaya edlîye ser o edalet nuseno la tede edalet çin o. Na dadîye 37 rojî qîrena vana 'edalet.' Ma do cigêrayîşê edaletî yê na dadîye teqîb bikerê.''