Qezaya Nisêbînî ya Mêrdînî de çawişê pisporî Eyup K.yî çar domanî tacîz kerdbî. Dima ke domanan qala tacîzî mamostaya xo rê vatbî derheqê çawişê pisporî de dewa amebî akerdene. La Eyup K.yo tacîzker roniştişê dewa yê 30ê teşrîna verêne de rixmê delîlan zî nêamebi tepiştene.

Hemsereka HEDEPî ya Nisêbînî Şîndare Akinci ANFyî rê qisey kerd û pare kerd ke sebebê zêdîyayîşê serebûtanê tecawuz, tacîz û fuhuşî konseptê şerê taybetî yo.

Hemsereke Şîndare Akinci bale ante serebûtê Eyup Kyî ser û vat: ''Ne bira veradîyayîşê çawişê pisporî ne zî pawitişê avûkatê ci nênê qebulkerdene. Wexto ke bire ameye eşkerakerdene qala 'welatperwerîya' çawişê pisporî ameya kerdene. Dêrik de zî qoricîyan tecawuzê cinîyêke kerdbî. Dima ke serebût vejîya werte qoricîyan vatbi 'a do bişîyêne koyî, coka ma no kerd.' Wexto ke bi taybetî kesê unîformakerdeyî sûcanê winayênan kenê nênê cezakerdene, eqsê ci seke yenê xelatkerdene.  Nê kesî pawitişê xo de qala perwerîya xo ya welatî kenê û vera dîyenê.''

Şîndare Akinci bale ante ser ke konseptê şerê taybetî prosesê xoverdayîşê xoîdarekerdişî ra dima hîra bîyo.

Şîndare Akinci vist vîrî ke wextê Hemşaredarîya Ayşe Gokkan de serebûtê sey tacîz, tecawuz, îstîsmar û şîdetî hende çin bîyê. Şîndare vat: ''Konseptê şerê taybetî vurîyeno. Asîmîlasyon û tecawuzê YÎBOyan zanîyenê. Bi serran bedenê gerîlayan ê cinîyan ameybî teşhîrkerdene. Mêrdîn de prosesê xoverdayîşê xoîdarekerdişî yê 2016î ra dima serebûtê vera cinîyan zêdîyayî. Pêro kerdoxê nê serebûtan zî wezîfedarê dewlete yê unîformakerdeyî yê. Serebûtê ke Nisêbîn de qewimîyenê ganî çarçewa konseptê şerê taybetî de bêrê ercnayene. Di hetê hêrişî est ê; nê hem vera bedenê cinîyan yenê kerdene hem zî vera kultur û nasnameyê cinîyan yenê kerdene. Kerdoxî zanenê ke do ceza nêgêre coka bi rehetî têgêrenê. Ma do qetî vera nê konseptê şerê taybetî bêveng nêmanê.''