Endama Komîteya Merkezî ya PKKyî Hêlîne Umît bernameyê taybetî yê Medya Haber TVyî de şerê gerîlayan ê vera hêrişanê îşxalî yê dewleta tirke ercna.

Qiseykerdişê Hêlîne Umît ra beşêk wina yo:

''Embazî hê Zap, Avaşîn, Metîna û Xakûrkê de destanan û tarîxî nusenê. Netîceyê raştikênî yê nê şerî dima do eşkera bibê. Embazê ma coka şerêkê heybetînî yê tarîxî kenê; îşxalkeran, qirkeran û kolonyalîstan ceza kenê. Nika ra aseno ke dişmen poşman bîyo. Çapemenîya tirkan zî zaf qala şerî nêkena. Dişmenî armanc kerd ke nê operasyonê 'Pençe-Kîlîtî' reyde şerê vera Têgêrayîşê Azadîye, PKKyî û şarê kurdî biresno artêka berzêre. La ê nika Zap û Avaşîn de kilîd bîyê, nêeşkenê aver şorê.

Şer nika her hetî ra vurîyayo sendromêkî. Artêşa tirke nê şerî de motîvasyonê xo yê serranê 90an zî vînî kerdo. Na arteşe vurîyaya artêşa kîrakerde. Keso ke wayîrê armancanê pîlan nîyo nêeşkeno nê şerî îdare bikero. PKK wayîrê armancanê pîlan o coka gerîlayî eşkenê nê şerî îdare bikerê. Ê nêeşkenê pê cerganê bipereyan nê şerî bikerê. Xora Tirkîya serî ra hetê binî teslîmê kapîtalîzmî bîye.

PKK û gerîlayî hêzê fedayî yê. Şehadet fitratê şerî de est o. Cinî, ciwan û şarê kurdî cuya azade wazenê. Coka şerê Zap û Avaşînî heta ke na netîce bikewa destî do dewam bikero. Netîceyê nê şerî do hîra bibê. Seke embazan vatbi faşîzmê AKP-MHPyî do Zap de bin bikewo. Her kes, hêzê mîyanneteweyî nika nê şerî teqîb kenê. 

Xora şer têna Avaşîn û Zap de nîyo.  Îqtîdar wazeno wina bimojno ke pêro Tirkîya kontrol kerda û nika zî derbazê Başûrî bîyo. La rewşa raştikêne wina nîya. Şero tewr girîng û esas Vakurê Kurdîstanî de yo. Mîsal Licê, Botan, Serhed de nika operasyonî est ê.Coka şer mîyanê Vakurî de, mîyanê Tirkîya de yo. Ma prosesêkê winasênî de yê ke no şer do çarenusê her kesî eşkera bikero. Ganî şer asta Şerê Şarî yê Şorişgêrî de bêro kerdene û ganî her kes, pêro kurdî, demokratî û azadîgîrî erkanê xo yê têkoşînî bîyarê ca. Wext wextê vindertişî nîyo.

Serra 2022yî do serra 2023yî dîyar bikera. 2023 seba dewleta tirke tarîxêko zaf girîng o. Ma armanc kenê ke 2023 de Kurdîstanê Azadî, Tirkîyaya demokratîke û Rojhelatê Mîyanênî yê demokratîkî awan bikerê. Ganî her kes barêke bigêro xo milî. Şer têna pê çeke nêno kerdene, metodê cîyayî est ê. Mîsal çira nika Vakur de serewedaritiş çin o?Eke ma estbîyayîş, nasname û rûmetê xo vînî bikerê, ma ra çi maneno? Wa pêro cinî, ciwan û şarê Vakurê Kurdîstanî vera nê şerî tewirê xo bimojnê.''