Endama Komîteya Merkezî ya PKKyî Hêlîne Umît Bernameyê Taybetî yê Medya Haberî de zîyaretê Wezîrê Karanê Teberî Hakan Fîdanî yê Başûrê Kurdîstanî ercna.

Qiseykerdişê Hêlîne Umît ra tay noqtayê girîngî wina yê:

''Tecrîdê vera Rayber Apoyî dewam keno. Vera tecrîdî têkoşîn yeno kerdene la no têkoşîn qîm nêkeno. Ganî ma bi hawayêkê bitesîrî vera tecrîdî têkoşîn bikerê û raştîya tecrîdî pêro dinya rê vila bikerê. Ganî ma xo vîr a nêkerê ke tecrîd teyna hetê Tirkîya ra ney hetê hêzanê mîyanneteweyîyan ra zî yeno caardene. Seba ke Rayber Apo bêro famkerdene ganî raştîya qirkerdişê vera kurdan bêra famkerdene. Ganî ma astêşa globale de vera tecrîdê Îmraliyî têkoşîn bikerê. 

Ganî bi taybetî roşnvîrî vera tecrîdî têbigêrê. Wa roşnvîrê Tirkîya cesur binê. Heta ke tecrîd nêqedo demokrasî zî do nêra Tirkîya. Bêvengîya vera tecrîdê Îmraliyî ra ewro no sîstem pêro zîndanan ra vila bîyo.

Hêzanê ma yê YJA-Starî û HPGyî bi wesîleya 15ê Tebaxe çalakîyê serkewteyî kerdî. Gerîlayî bi hawayêkê bêhempayî vera îşxalê dewleta tirke xo ver danê. Gerîlayî hê erdê Başûrî vera îşxalkeran pawenê. Dewleta tirke kişteyanê xo nimnena û verê nêrazîbîyayîşê şarî gêna. Ganî şar bizano ke nê şerî ra ewro binê krîzêkê ekonomîkî yê winayênî de mendo. 

Dewleta tirke plan kena ke newe ra hêrişê Rojawanî bikera û zereyê Başûrî de îşxalê xo hîra bikera. Dewleta tirke hêrişanê xo rê PKKyî sey bahane mojnena. La raştîye wina nîya. Dewleta tirke cara dişmena kurdan a. 

Dewleta tirke kena ke Rojawan pê destê cerganê xo û hêzanê xo bikera erdê tirkan. Her roje Rojawan de hêrişê vera şar û cinîyan qewimîyenê. Hêzê Mîyanneteweyî vera nê kerdişan bêveng ê. Pêro şarê ma ganî wayîrê Şorişê Rojawanî vejîyo. Ganî serkêşîya cinîyan de Rojawan de têkoşîn dewam bikero. 

Wezîrê Karanê Teberî yê Tirkîya Hakan Fîdano ke Serekê MÎTî yo verên bi, kiştoxê kurdan o. Hakan Fîdan şi Iraq û uca de selahîyetdaranê Iraqî ra waşt ke PKKyî bigêrê mîyanê lîsteya terorî. Ma pê bawer ê ke Iraqî no waştiş red kerdo. Ma dişmenê Iraqî nîyê û vera Iraqî yew têgêrayîşê ma çin o.

Hakan Fîdan dima şi, ey selahîyetdaranê PDKyî de pêvînayîşî kerdî. PDK hînî beno şermê kurdayetîye. Barzanîyan Hakan Fîdan kerd verarê xo. Keyeyê Barzanîyan resmen destkewteyanê Başûrî roşeno. Dewleta tirke vana qey ma do şarê Başûrî de pêbikewo. La ma terefgîrê yewîye yê û do qetî çîyê winayênî nêkerê. Ma vera xeta îxanetî vejîyenê. Şarê kurdî, roşnvîrê Başûrî, sîyasetmedar û şarê Başûrî ganî verê îxanetê PDKyî bigêrê. PDKyî Kerkûk zî dayo tirkan. Eke PKK qels bibo dewleta tirke do PDKyî werte ra wedarno. Ganî şar, roşnvîr û sîyasetmedarê kurdî vera îxanetê PDKyî nêrazîbîyayîşê xo bimojnê. Zîyaretê PDK-Fîdanî de çi ameyo qiseykerdene? Ê kenê ke sereyê kurdan têmîyan bikerê. 

Ez di Mayanê Haştîye yê ke qeza de şehîd bîyê bi rêzî yad kena. Ez venga Mayanê Haştîye, keyeyanê şehîdan, tepişteyan û gerîlayan û şarê kurdî dana ke prosesê verê ma de têkoşînî berz bikerê û hîna zaf tewrê prosesî bibê. Her kesî rê serkewtiş wazena.''