Bi wesîle menga gulane ya şehîdan fermandaranê HPGyî ra Yaşar Serhatî qala cuya têkoşînî ya kadroyanê serkêşan ê PKKyî ra Hakî Karerî yo ke 18ê gulana 1977î de şehîd bi û sey mîlîtano ke tewr zaf Rayberê Şarê Kurdî Abdullah Ocalanî fehm kerd û waştişê ci ardî ca yeno zanayene, kerde.

Fermandar Yaşar Serhatî sere de şexsê Mehmet Karasungur, Halîl Bîlgîn û Hozane Mîzgîn de heme şehîdê menga gulane yad kerdî.

Serhatî vist vîrî ke Rayberê Şarê Kurdî Abdullah Ocalanî hemrayîya qehremananê PKKyî ra Hakî Karerî sey tarîxî û bimbarek ercneno û vat: ''Rayber Apo semedê Hakî Karerî vano 'O ruhê min o nimite yo'. No yeno no mana hemra Hakî tewr zaf fîkîr û kesayetê Rayber Apoyî fehmkerdî û pratik de artî ca. Hemrayê ma yê ke hemra Hakîyî nas kenê tim qala ey kenê ke senî pak, durust, fedakar û cesûr bi. Înan pê tewirê xo yê cuya û hemrayîya xo ruhê PKKyî arde ra. Rayber Apo vano ke 'Hakî Karer û Kemal Pîr di domanê Dengizê Reşî yê ke qet leşin nêbîyî'. Hemrayîya Rayber Apo û Hakî Karerî temsîlkarîya wayûbiratîya şaran kena.''

Yaşar Serhatî wina dewam kerd: ''80yan de hema ke têgêrayîşê PKKyî tem ca xo nêdabi derbeya 12ê Êlule bîye û xeylêk embazê ma yê serkêşî ameyî tepiştene. Seba ke Rayber Apoyî çîyo winayên pawitêne tay endamê partîye girewtbî cayanê mehkeman. Dişmenî plan kerdêne ke Zîndanê Amedî de îradeyê kadroyanê ma yê serkêşan bişikno û partîya ma tesfîye bikero. Xoverdayîşê Zîndanê Amedî bi bi çalakîya 21ê Adare Newroze ya Mazlûm Doganî dest pêkeno. Xoverdayîşê embaz Mazlûmî semedê xoverdayîşê embazanê Zîndanê Amedî bêno çîqê adirî. Eynî serre çalakîya embazan Ferhat Kurtay, Necmî Oner, Eşref Anyik û Mahmut Zengînî bena. Çalakîya çaran vera wehşet û faşîzmê Zîndanê Amedî bena nameyê serkewtişî.''

Serhatî vat: ''6ê gulane 1996î de vera Rayber Apoyî sûîqest ame kerdene. 6ê gulane roja dardekerdişê Denîz Gezmîş û embazanê ci ya. 30ê hezîrane de embaza Zîlane bi çalakîya xo cewabê nê hêrişî da. Reyna 29ê hezîrana 1999î  de zî de derheqê Rayber Apoyî de qerarê dardekerdişî ame dayene ke na roje roja dardekerdişê rayberanê kurdan ra Sêx Seîdî ya. dewleta tirke tarîxanê qirkerdişanê xo tim vîjnena pê înan mesajan dana. PKK têgêrayîşo tarîxî û komelkî yo. Sozê ma yê şehîdan sozê serkewtişî yo.''