Hemşaredarê Nisêbîn, Erdîş, Gever û Colemêrgî ameyî destbendkerdene

Hemşaredarê Nisêbînî Semîre Nergîze û Ferhat Kutî, Hemşaredarê Colemêrgî Cîhan Karaman, Hemşaredarê Geverî Remzîye Yaşare û Îrfan Sari  û Hemşaredarê Erdîşî Yildiz Çetîne û Bayram Çîçek zî tede xeylî kesî ameyî destbendkerdene. 

Dimayê hêrişanê îşxalkaranê Tirkîya yê serê Rojawanî  Kurdistan de operasyonê desbendkerdişî zî dewam kenê. Colemêrg, Gever, Nisêbîn û Erdîş de polîsan eşt şaredarîyanê HDP û keyayan ser hemşarî zî tede xeylî kesî destbend kerdî.

Nisêbîn

Polîsan ewro serê  sibayî qezaya Nisêbînî ya Mêrdînî de eşt xeylî keyeyan ser û  bînaya Şaredarîya Nisêbînî de cigêrayîş kerd. Polîsan eşt keyeyê Hemşaredare Semîre Nergîz û  dewa Zorava zî eşt serê keyeyê Hemşaredar Ferhat Kutî û her di şaredarî zî destbend kerdî. Polîsan eşt serê "Masaya Krîzî" zî û Masaya Krîzîya ke seba ke mexdûrîyetê şarê Nisêbînî amebi sazkerdene. Polîsan wexto ke eşt ser masaye, xebatkarê masaye zî derb kerdî. Eşkera bîya ke polîsan pirnika xebatkarêkî şikite û çeneyê xebatkarêke zî birîndar kerd. Wexto ke polîsan eşt serê Masaya Krîzî, endamê Meclîsê Şaredarîye Mehmet Emîn Alkanî yê HDP'yî destbend kerd. Ame zanayene ke hemşaredar û encumenê ke ameyî destbendkerdene Mudirîyetê Polîsan ê Qezaye de yenê tepiştene. Yena pawene ke ê bêrê berdene bi Mudirîya Polîsan a Mêrdînî. Yeno pawitene ke hûmara kesanê ke ameyî destbendkerdene qezaye de beno ke zêde biba. 

Colemêrg

Colemêrgî de zî polîsan eşt serê bînaya şaredarîye. Bînaya şaredarîye de cigêrayîş dewam keno. Heman wextî de polîsan eşt ser keyeyê Hemşaredarê Colemêrgî Cîhan Karaman zî. Karaman zî ame dest bendkerdene û berdene bi Mudirîya  Polîsan a Colemêrgî.

Gever

Reyna qezaya Geverî ya Colemergî de zî Hemşaredarî Remzîye Yaşare û Îrfan Sari ameyî destbendkerdene.

Erdîş

Wan de bi seyan polîsanê Tirkî eşt serê Şaredarîya Qezaya Erdîşî. Hemşaredarê Erdîşî Yildiz Çetîne û Bayram Çîçek ameyî destbendkerdene. Qezaya Erdîşî ya Wanî de polîsanê Tirkî serê sibayî dormeyê bînaya Şaredarîya Erdîşî ya HDP'yî girewt. Polîsanê Tirkî bînaya şaredarîye û bînaya HDP'yî de cigêrayîşî kerdî. Polîsan nêverde ke kesêk debikewo bînaya şaredarîye. Hemşaredarê Erdîşê Yildiz Çetîne û Bayram Çîçek tede di encumenê şaredarîye ameyî destbendkerdene.Yena vatene ke qeyûm do reyna  Şaredarîya Erdişî de bêro cakerdene.