Avûkat ke Hemşaredarê Pasûrî Mehmet Fatîh Taşî Eyup Aydenîzî da zanayene ke derheqê destbendkerdişî de sebebêk nêamo mojnayene û vat muwekîlê me bîlaheq ameyo girewtene.

Mudirê Karanê Fenî yê Şaredarîya Pasûrî Şener Aktaş, Hemserekê HDP'yî yê qezaya Pasûrî ya Amedî  Abîdîn Karaman, dimayê teqîyayîşê Pasûrî ameyî destbendkerdene. Serekkomaro Tirk Recep Tayyîp Erdogan vato: "Do zafê kesî bêrê destbendkerdene." Nê qiseyê Erdoganî ra dima Hemşaredarê Pasûrî Mehmet Fatîh Taş zî ame destbendkerdene. Eyup Aydenîzo ke avûkatê Taşî yo Mûdirîyeta Emnîyetî ya Pasûrî de muwekilê xo dîyo. Aydenîz îfade kerd ke babeta destbendkerdişî de sebebêk nêamo mojnayene û her çiqas zaf waşt ke nêşikîyayo dozger de qisey biko. Avûkatê Aktaşî, Mehmet Oner zî îfade kerd ke hemşaredarî seba tahqîqatê teqayîşî nêamê destbendkerdene. Oner eşkere kerd ke dosyaya tahqîqatî de qerarê destbendkerdişan û raporê weşîye ra ber raporêk û delîlêk çin o.