'Heqê çewî çin o ke hêrişanê dewleta tirke meşrû bivîno'

Mihemed Nesredînî îfade kerd ke ganî çew hêrişanê dewleta tirke meşrû nêvîno û vat: ''Tirkîya her roje bi hêrişanê xo dişmenîya xo ya vera kurdan dibare kena.''

Çimdarê sîyasîyî yê Kerkûkî Mihemed Nesredînî ANFyî rê qisey kerd û hêrişê dewleta tirke ya îşxalkere yê vera Başûrê Kurdîstanî ercnayî.

Nesredînî hêrişê dewleta tirke yê vera Çemçemal û Mexmûrî vist vîrî û pare kerd ke nê hêrişî zî mojnenê ke dewleta tirke têna dişmenîya kurdan kena û vat: ''Dewleta tirke xo rê PKKyî kena bahane la no raşt nîyo. Dewleta tirke armanc kena ke îradeyê pêro kurdan bişikna. Dewleta tirke bi bombardumanan şarê sivîlî hedef kena. Ganî nê hêrişî nêrê meşrûkerdene. Ganî Herêma Kurdîstanî û hukmatê Iraqî vera nê hêrişan tewirê xo bimojnê û verê Tirkîya bigêrê. Tirkîya sînoranê Iraqî binpay kena. Ganî nê prosesî de sere de Hukmatê Başûrî pêro hêz û partîyê Başûrî vera hêrişan yew bibê.''

Mihemed Nesredînî bale ante ser ke hêrişê dewleta tirke nê rojan de zaf zêdîyayî û vat: ''Tirkîya her roje bi hêrişanê xo dişmenîya xo ya vera kurdan dibare kena. Hukmatê Herêma Kurdîstanî û Iraqî vera hêrişan bêveng ê çunke mabênê înan û Tirkîya de menfaatê hemparî est ê. No zî şermê înan o. Bi nê hawayî Tirkîya zî serê hukmatê Başûrî ra hêrişanê xo meşrû kena. ''