Torra Ziwan û Kulturî 7ê hezîrane de Amed de seba kurdkî nawnayîşan do bikera. Nawnayîşê Amedî saete 16.00 de Meydanê Îstasyonî de do bêro kerdene. Hemserekê KCDyî Berdan Ozturk, Aktîvîsta Têgêrayîşê Cinîyan ê Azadan (TJA) Safîye Akdag, Hemsereka Komeleya Cigêrayîşanê Kultur û Ziwanî ya Mezopotamya (MED-DER) Şîlane Elmas kan, Vervatoxê Platformê Ziwanê Kurdkî Şerefhan Cizîrî do nawnayîş de qisey bikerê. Koma Dengê Jinên Azad, Mehmet Atli û Koma Dîcle-Firatî zî do vejîyê sehne û hunerê xo pêşkêş bikerê.

Hemsereka MED-DERî û Sekretera Torra Kultur û Ziwanî Şîlane Elmas Kan ard ziwan ke semedo ke kurdkî biba ziwanê fermî ê nê nawnayîşan do bikerê. Şîlane da zanayene ke înan seba nawnayîşî muracatê Walîtîya Amedî kerd û vist vîrî qeyûmî ra dima şaristan de pêro xebatê kurdkî ameyî wedarnayene û tedaya vera kurdkî zêdîyaye.

Şîlane vat: ''Kampanyaya 'Wa kurdkî biba ziwanê perwerdeyî û fermî' dewam kena. Ma do na çarçewe de zaf xebatan do bikerê. Ma do dewan de seba tûtan kursan abikerê.

Ma venga pêro şarê xo danê ke wa wayîrê ziwanê xo vejîyê û tewrê nawnayîşî bibê. Ganî kurdî seba pawitiş û averberdişê ziwanê xo zêdêr têkoşîn bikerê. Ma do pê girseyanê pîlan 7ê hezîrane de vejîyê meydanan û tewrê nawnayîşî bibê.''