Vera tecrîdê serê Rayberê Şarê Kurdî Abdullah Ocalanî, Hewlêr de temsîlkarîya HDP’yî de grevê vêşanîye ke amebi destpêkerdene, kewt roja xo ya 102’yîne. Ewro yew gruba cinîyan şîye zîyaretê çalakwanan.

Cinîyan ê zîyaretkaran  ra Semîra Saleye ANF’yî rê qisey kerd û va: “Ewro ganî, seba ke tecrîdê serê Rayber Ocalanî bêro şikitene, pêro cinîyî paştdarîye bidê çalakwanan û xo ver bidê. Çunke tarîxê Kurdan de paştdarîye ya tewr pîle Rayber Apoyî daya cinîyan.”

Saleye dewamê qiseykerdişê xo de bale ante felsefe û ferasetê Ocalanî ser û va: “Cinîyî saya felsefe û fikre Ocalanî koletîye û sîstemê camerdîye ra xelesîyayê û bîyê azad. Cinîyê Kurdî bi na felsefe, Rojakewtena Mîyanêne de bîyê serkeş û pêroyê cinîyanê dinyaye rê bîyê sey nimûne. DAÎŞ, bi na felsefe, hetê cinîyan ra ame qedinayene.”

Semîra Saleye qiseykerdişê xo de venga pêroyê cinîyanê Başurî da û waşt ke wa paştdarîye bidê çalakîyan û wina va: ”Cinîyî, ganî paştdarîye bidê çalakîyan. Çunke wextêko winasî de cinîyî serkêşîya mücadeleye Kurdan kenê û bêvengîya cinîyan nêna qebûlkerdene.”