Paytextê Herêma Kurdîstanê Federalî Hewlêr de bi vengdayîşê Partîya Komînîste ya Kurdîstanî verê parlamentoyî de hêrişê îşxalî yê dewleta tirke ameyî şermezarkerdene. Çalakwanan waşt wa dewleta tirke Herêma Kurdîstanî ra vejîyo.
Dewleta tirke ya ke bi des serran o herêma Kurdîstanî de baregehanê leşkerî virazena serranê peyênen de hûmarê baregehan zêdînaye û warê îşxalî kerdî hîra.
23ê nîsane ra nata bitaybetî vera herêmanê Metîna, Avaşîn û Zapî operasyonê îşxayî yo newe dîya destpêkerdene. Dewî sîstemkî hedef yenê girewtene û ke bêrê vengkerdene, vera nayî Hukmatê Herêma Kurdîstanî bêveng o.
Vera hêrişê îşxalî Başûrê Kurdîstanî de nêrazîbîyayîşî zêdîyenê. Partîya Komînîste ya Kurdîstanî (KKP) verê parlementoyê Hewlêrî de çalakîya şermezarkerdişî kerde.
Eşkerayîye de ame waştene ke wa pêkerdişê Iraq û Tirkîya yê derheqê asayîşê sînorî bêro betalkerdene û vera îşxalê dewleta tirke sînor bêro pawitene. Çalakwanan waşt wa dewleta tirke Herêma Kurdîstanî ra vejîyo. Eşkerayîye de bale ameye ante binpaykerdişê huqûqê mîyanneteweyî talankerdişê xoza û birnayîşê daran ser û ame vatene ke nê sûcê şerî yê.
Qiseykerdişan de wina ame vatene: ''Rîyê îdarekeridşê xirabî yê Herêma Kurdîstanî ra rojane heq û azadîyîye yenê binpaykerdene.Maeşê karkerdan û kedakaran ameyî wardayene û vayîye zêdîyaye. Hemwelatîyî tengayî ancenê.''
Partîya Komînîste badê eşkerayîye waştişê xo yê derheqê vera hêrişî û semedê heqanê kedkeran teqîdê parlementoyî kerdî.
