Heyetê Îdareyî yê Şingalî bi eşkerayîyêke Ferhad Şiblî yad kerd.

Eşkerayîye de qala têkoşînê ey ameye kerdene û wina ame vatene: ''Her kesî o pê têkoşînê ci şinasnayêne. O pê keda xo bi serkêşê şarê êzidîyan ê Rojawanî, ver bi Şingalêkê xoserî û azadî şi.  O serkêş û fermandaranê Şorişê Rojawanî ra yew bi, coka hetê dewleta tirke ra ame hedefkerdene. La ma do têkoşînê serkêşanê xo rê dewam bikerê.  

Keyeyê ey zî seba azadîya komelî kedêka pîle daye. Wexto ke şarê ma binê ablûqa de bi, birayê Ferhad Şiblîyî Îsam Şiblî mîyanê YPGyî de Şingal de şehîd bi. Xêrê keda nê şehîdan ra ewro ma payan ser de yê. Ma verê vîrameyîşê Ferhad Şiblîyî de sereyê xo bi rêzî anê war. Şexsê Ferhad Şiblîyî de ma pêro şehîdan ancî yad kenê. Nameyê şar û dezgehanê Îdareyê Xoserî yê Şingalî ser o keyeyê ey ê xoverdayoxî û şarê xo rê serweşîye wazenê.''