Qezaya Şaxî ya Wanî de êlule de hemwelatîyê bi nameyê Servet Turgut û Osman Şîban yê ke ameyî destbendkerdene pê îşkence helîkopterî ra ameyî wareştene. HDPyî ra heyetê semedê cigêrayîşê qewimîyayîşî şi Wan.

HDPyîjan ke waşt heyetî meydanê teyaran de  şirê vera hetî la  hetê polîsan ra ameyî astengkerdene. Mabênê heyet û polîsan de munaqeşe vejîya dima ra HDPyîjî şîyî Meydanê Teyarayan ê Ferit Melenî û tîya reyna astenkerdiş û munaqeşeyî qewimîyayî. Heyetê ke serhekîmê Nêweşxaneyê Cigêrayîşî yê Herême yê Wanî de pêvînayîşêk kerd dima ra waşt ke verê nêweşxaneyî de eşkerayîye bide la polîsan destur nêda. Badê munaqeşeyan heyetê ablûqaya polîsan de bê çapemenî eşkerayîye daye.

Serekwekîlê Grûba HDPyî Saruhan Oluçî ke bi nameyê grûbe qisey kerd nê vatî: ''Ma derheqê raporan û rewaşa hemwelatijê ma yo ke nika beşê ciewnîyayîşê giranî de yo zanayîş girewt. Çi heyf ke rewşa ci zaf giran a la hûmayî ra hevî nêbirîyena. Hemwelatîyo bîn nêweşxane ra vejîyo. La goreyê zanayîşê ke ma girewtî yewna nêweşxane de binê çimdarî de yo.

Walîyê Wanî ke ke eynî wext de qeyûm o vano wird hemwelatîye goreyê usulan ameyî girewtene. Yanî travmayê beden û sereyî, xeylêk şikîyayîşî, gonîbîyayîşê zereyî û mezgî, vînbîyayîşê vîrî nê pêro goreyê uselê. Eşkerayo ke îşkence ameyokerdene. Karê walî nimitişê îşkenceyî nîyo, wezîfeyê ey îşkencekaran vejo werte pa înano ke talîmat dayo bêrê cezakerdene. Ma tîya ra veng danê hukmatî û vanê ke kam no îşkence kerd? Êyê ke kurdan rê îşkence kenê herinda cezakerdiş de yenê xelatkerdene. Ma do peynîya nê cameverdê.

Îqtîdar bi zulmî payra yo û wazeno pê zulmî çok bido dayene. Nê, ma qetîyen vera naye milê xo çewt nêkenê û çok nêdanê. Ne şarê kurdî ne zî hêzê demokrasî yê Tirkîya ne HDP û ne zî muxalefeto komelkî û sîyasal vera bêhuqûqîye, zulm û bêedaletîya îqtîdarî çok dano. Ez naye eşkera vejî; ma nê îqtîdarî ra fehmkerdiş û merhemet parse nêkenê. Ma zanê ke semedê rojanê rindan komel do sereberz payra vindero.''