5ê hezîrane de konvoyê wesayîtanê hêzanê PDKyî verê xo dabi herêma Metîna ke tede gerîlayî vera artêşa tirke şer kenê.  Wexto ke konvoy resa warê gerîlayan teqayîşêko pîl qewimîya û 5 pêşmergeyî merdî. HPGyî hêrişî ra dima eşkera kerd ke hêriş hetê înan ra nêame kerdene û heyetêk eşkeno bêro war de cigêrayîş bikero. 

Goreyê xebera Rojnewsî heyetêko hempar ê parlamenteranê Bexdad û Hewlêrî serebût do Metîna de cigêrayîş bikero.

Endamê Koma Goranî ya Parlemntoya Herêma Kurdîstanî Şaxewan Reuf zî heyet de ca gêno. Reufî vat: ''Heyet parlamentoyanê Iraq û Herêma Kurdîstanî temsîl keno.''

Reufî da zanayene ke mîyanê heyetî de endamê kom û partîyan estê û vat: ''Ma do ewro şorê Zaxo, Şeraniş û Batufa. Siba zî ma do şorê herêma Amedîyê. Ma wazenê sere de cayê serebûtî pêro cayan de cigêrayîş bikerê. Wexto ke zîyaretê ma qedîya ma do raporêk amade bikerê.''