Hemsereka Konseya Rayberdişî ya KCKyî Besê Hozat ANFyî rê rojdem ercna. Beşo dîyin û peyên ê qiseykerdişê Hozate wina yo:

''Îqtîdarê AKP-MHPyî seba ke payan ser o bimano şer keno pîlêr. Hêrişê vera HDPyî parçeyê nê şerî yê. Tirkîya bîya qels û teslîmê Amerîka û NATOyî. Îqtîdar wazeno pê çimtersnayîşî komel kontrol bikero. HDP pê hîşmendîya neteweya demokratîke yewîya demokratîke ya şaran paweno, komara demokratîke paweno. Îqtîdar dişmenê nê erjanê ke HDP paweno. Coka hêrişê HDPyî keno. AKP nêwazeno meseleya kurdan çareser bibo û wazeno HDPyî teng bikero. Hêrişê vera Denîze Poyraz zî bê nê armancî ame kerdene. 

Kiştoxê Denîze Poyraz îqtîdaro faşîst ê AKP-MHPyî yo. Îqtîdar pê qirkerdişê winasênî wazeno HDP bêtesîr bikero. HDP do xoverdayîşê xo pîl bikero. Qederê HDPyî de esto ke Tirkîya îdare bikero, bibo hemparê îdareyê Tirkîya. Îqtîdar do nêeşko na raştîye bivurna.Hetê bînî ra nê hêrişê vera HDPyî qelsîya îqtîdarî zî eşkera kenê. No îqtîdar hînî bîyo mafya û çete. Têna HDP eşkeno îqtîdarî birijno. Xoverdayîşê HDPyî pêro têkoşînan bihêzêr keno. Coka îqtîdar wazeno ey tasfîye bikero.

Îqtîdarê AKP-MHPyî dewamê hîşmendîya Îttîhat û Terakkî yo û temsîlkarîya nînan keno. Şarê Tirkîya, kurdî, hêzê demokrasî bi des serran o vera na hîşmendîye xo ver danê. Şarê Kurdîstanî û Tirkîya û hêzê demokrasî, cinîyî bi xurtî wayîrê Denîze Poyraz vejîyayî û pîya vat 'Ma pêro Denîz ê, ma pêro HDP yê.' Seba demokratîkbîyayîşê Tirkîya û çareserîya meseleya kurdan no serebûtêko girîng o. Reyna eşkera bi ke komelê Tirkîya hetê şarê kurdî de vera faşîzmî wazeno îtîfaqo demokrasî awan bikero. Seba ke faşîzm bêro rijnayene ganî no îtîfaq bêro awankerdene. 

Îqtîdaro faşîst seba menfaatanê xo  erjanê komelî yê Tirkîya, kulturê cuya hempare û tarîxê ci çin keno. Îqtîdar wazeno hêzanê demokrasî tasfîye bilero. Îqtîdar wina hesab keno ke eke HDP biqedîno eşkeno muxalefetê Tirkîya biqedîno. Tirkîya de hêrişî têna vera HDPyî nîyê, hînî asayîşê ganê çewî nêmendo. Ganî hêzê demokrasî vera faşîzmî bibê yew, têkoşînê hemparî bikerê. O çax ê do qetî ser bikewê. 

Faşîzmî ra tek rayîrê xelisîyayîşî têkoşîno hempar ê hêzanê demokratîkan o. Vera nê îtîfaqî de tek astengîye zî hesabê menfaatan ê. Êyê ke goş nêdanê kurdan, ca nêdanê kurdan nêeşkenê îtîfaqê hemparî awan bikerê û bixelisê. Tirkîya de Partîya Çepgîre û tay CHPgîrî wina têgêrenê û îtîfaqê hemparî kenê jehrînî. Hînî Tirkîya de seba weçînayîşê demokratîkî pê têkoşînê hemparî hewce esto. CHP û êyê ke wayîrê hîşmendîya CHPyî yê ameyoxê komelî rê xirabîye kenê. Faşîzm pê têkoşînê komelkî rijîyeno. Eke merdim (CHP) tewirê şarî sey provakasyon pênase bikero no yeno paştdayîşê faşîzmî.

Faşîzmê AKP-MHPyî dişmenê cinîyan o. Îqtîdar keno ke destkewteyan û têkoşînê cinîyan çin bikero. Tirkîya de û Kurdîstan de tewr zaf cinîyî vera îqtîdarî têkoşîn kenê. Têkoşînê cinîyan do nê îtîfaqî birijno. Têgêrayîşê cinîyan heta nika zaf xurtî ra verê îqtîdarê faşîstî de vindert. Cinîyî her roje kuçe û waran de xo ver danê, vejîyenê meydanan. Paştdayîşê têgêrayîşanê cinîyan ê Kurdîstanî û Tirkîya eke hîşmendîya têkoşînê hemmparî bikerê rayîranê pîlan do abikerê. Ê do hem bieşkê destkewteyanê xo bipawê hem zî vurîyayîşê Tirkîya de bibê hêzê rayberî. Cinîyî xora pê têkoşînê xo kokê faşîzmî vêşnenê. Têkoşîno yewbîyaye yê cinîyan do pêro cinîyan rakero payan ser û peynîya faşîzmî bîyaro.''