Hemsereka Konseya Rayberdişî ya KCKyî Besê Hozat ANFyî rê rojdem ercna û xeylêk babetan ser o qisey kerd.

Qiseykerdişê Besê Hozat ra beşêk wina yo:

''Îdîayê serê weşîya Rayber Apoyî şero psîkolojîk o taybet o.Şarê ma nêzdîbîyayîşê winasênî do qebul nêkero. Dewlete nêeşkena sîstemê tecrîdî yê Îmraliyî bikerê hacetê şerê taybetî.Ez venga hêzanê mîyanneteweyîyan dana ke wa vera  tecrîdî têbigêrê. Sîstemê Îmraliyî têna hetê dewleta tirke ra nêno caardene. Sere de Amerîka û Konseya Ewropa blokê welatanê Ewropa tecrîd anê ca. Pê tecrîdî ê wazenê têkilîya şar û Rayber Apoyî bibirnê. Ma venga înan danê ke wa nê polîtîkayan ra fek vera bidê.

Amerîka, welatê Ewropa, CPT pêro tecrîdê Îmraliyî ra mesuldar ê. Eke ê wazenê kurdan ra efûya xo biwazê ganî goş bidê înan ser ke azadîya Rayber Apoyî wazenê. Sîstemê tecrîdî parçeyêkê polîtîkaya qirkerdişî ya. Rîyo diyîn ê tecrîdî faşîzm o.

Pêro dinya de seba azadîya Rayber Apoyî çalakîyî estê. Ganî nê çalakîyî bêrê rengînkerdene, geşkerdene û dewam bikerê. Wextê ci ameyo ke Rayber Apo bêro azadkerdene. Ganî ma nê wayîrvejîyayîşê globalî bivurnê  azadîya Rayber Apoyî.

Rojbîyayîşê Rayber Apoyî rojbîyayîşê kurdan, cinîyan şaran a. Rayber Apo nasnameyêko komelkî yo.Rayber Apo hînî bîyo wayîrê nasnameyêkê mîyanneteweyî. Rojbîyayîşê Rayber Apoyî de wa şarê ma pê geşkerdişê têkoşînî wa cewab bido.Safhaya nikayêne de waştişê wedaritişê tecrîdî hînî qîm nêkeno. Tecrîd ancax pê azadîya Rayber Apoyî eşkeno biqedo.

Newroza emserîne bîya îfadeyê xoverdayîşê Garê yê şarî. Newroze serî ra heta binî pê mesajanê sîyasîyan pirr bîye. Newroze mujdeyê serkewtişî yê hemleya 'Wextê ci ameyo' da. Xoverdayîşê Garê moralêko pîl da şarê ma. Newroze reyna ame mojnayene ke gerîlayî û şarî pîya yê û cîya nêbenê. Newroze cewabê dewaya qefilnayîşê HDPyî zî da. Vera faşîzmî Newroze mesajê xoverdayîşî da.

Xoverdayîşê Garê maskeyê îqtîdarê faşîstî vistî warî. Merkezê şerê taybetî bin kewt. Soyluyî vatêne 'ma PKK qedîna.' Garê de hêvîyê înan şikîyayî. Serfîrazîya Garê polîtîkayê AKP-MHPyî rijnayî û tersê binkewtişî yê dîktator Erdoganî kerd kronîk.

Îqtîdar seba ke sîyasetê demokratîkî bin bivisno hêrişê HDPyî keno. HDP sîyasetê Tirkîya de tek hêzê muxalefetî yo, belaya sereyê faşîzmî ya. Seba ke no faşîzm bin bikewo ganî xeta têkoşînê antîfaşîstî bêro ronayene. Vera faşîzmî awankerdişê têkoşînê hemparî girîng o.

Peymana 9ê teşrîna verêne yena manaya qirkerdişê êzidîyan. Amerîka, Tirkîya, Bexdad û Hewlêr paştî danê na peymane. Îdareyê Iraqî pê polîtîkayanê xo yê nikayînan êzidîyan rê xoverdayîşî ra ber rayîrêk nêverda. Xora êzidîyî zî ha vera na peymane xo ver danê. Xoîdarekerdişê Şingalî do demokrasîya Iraqî xurt bikero. Eke Iraq nê îdareyî bişinaso aramîye do bêra Iraq û Şingalî.''