Merkezê Îrtîbatî û Çapemenîye yê HPGyî derheqê çalakîyanê gerîlayan de bi eşkerayîyêke agahîyî dayî. Eşkerayîye wina ya:

''Çarçewa Hemleya Şorişgêre ya Cengê Xabûrî de;

28ê gulane de Girê Sorî yê warê Derarê yê Metîna de mewzîyê çeka A4î vera îşxalkeranê Zendûra çalakîyêke ameye kerdene. Çalakîye de 3 îşxalkerê ke mewzîyê A4î de bîyî ameyî cezakerdene çeka A4î û mewzî bi temamî ameyî îmhakerdene.

Çalakîye ra dima îşxalkeran Girê Zendûra, Hirorê, Kêste yê Metîna pê obus û hawanan dayî bombayan ver. Helîkopteranê hêrişî wexto ke erazîyê dewa Kêste û Girê Zendûra bombarduman kerdêne hêzanê ma da nê helîkopteran ro. Dima helîkopterî warî ra remayî.

29ê gulane de îşxalkeran waşt debikewê tunelanê şerî yê Girê Zendûra û dima ke nêeşkayî xîret kerd ke pê wesayîtê zirxinî yê bi kumanda debikewê tunelan. No wesayîto zirxîn hetê hêzanê ma ra ame pirodayene.

29ê gulane de îşxalkerê ke Girê Mele Yehya yê Heftanînî ra şîyêne dewa Keşanî gêrîyayî binê kontrolê hêzanê ma. Hêzanê ma yê YJA-Starî da nê îşxalkeran ro. Netîceya çalakîye de hûmara kişte û birîndaran nêameye zelalkerdene û îşxalkeran xo warî ra apey girewt.

Çarçewa Hemleya Şorişgêre ya Bazanê Zagrosî de;

19ê gulane de warê Herfa Tyî yê herêma Zapî de hêzanê ma da îşxalkeran ro. Îşxalkerê ke ameyî yewca pê çekanê ferdîyan piro dîyayî dima zî pêkewtişêko giran qewimîya. Netîceya çalakîye de 4 îşxalkerî ameyî cezakerdene. Embazanê ma Agît Batman û Rêber Nisêbîn nê pêkewtişî de bi çêrî şer kerd û şehîd bîyî.

Nasnameyê embazanê ma yê şehîdan wina yo:

Nameyê Kodî: Agît Batman Name û Peyname: Veysî Yomen Cayê Bîyayîşî: Batman Maye-Pî: Hayriye – Mustafa Tarîx û Cayê Şehadetî: 19ê Gulana 2021î / Zap

Nameyê Qodî: Rêber Nisêbîn Name û Peyname: Suleyman Aydin Cayê Bîyayîşî: Nisêbîn Maye-Pî: Hasime – Zubeyir Tarîx û Cayê Şehadetî: 19ê Gulana 2021î / Zap

Embaz Agît Êlih de dadîya xo ra bi û pê mesuldarîya tarîxî tewrê karanê ciwanan bi. Embaz Agit dima tewrê gerîlayan bi û seba ke xo rê Fermandar Agît (Mahsûm Korkmaz) mîsal girewt nameyê ey na xo. Embaz Agît Avaşînî ra heta Zap û Zagrosan xeylêk cayan de têkoşîn kerd û fermandarêko marîfetîn.Embaz Agîtî Zap de xeylêk çalakîyan rê rayberîye kerde û îşxalkerê kolonyalîstî ceza kerdî.

Embaz Rêber Nisêbîn de dadîya xo ra bi û serra 2020î de tewrê gerîlayan bi. Embaz Rêberî Zap de dest pê gerîlatîye kerd û wextêkê kilmî de bi gerîlayêko marîfetîn. Embazê ma Rêber tewrê çalakîyanê qesasî bi, vera dişmenê hêrsê xo mojna û tewr peyên warê Herfa Tyî yê Zapî de bi çêrî şer kerd, şi serê dişmenî û şehîd bi.

Kurojehro de 2 gerîlayî şehîd bîyî

20ê gulane de bombardumanê vera warê Kurojehroyî yê herêma Zapî de embazê ma Brûsk Kobanê û Rêdûr Cûdî şehîd bîyî. Nasnameyê embazanê ma wina yê:

Nameyê Qodî: Rêdûr Cudi Name û Peyname: Muhammed Mehdi Tanrıverdi Cayê Bîyayîşî: Şirnex Maye-Pî: Besna – Ramazan Tarîx û Cayê Şehadetî: 20ê Gulana 2021î / Zap

Nameyê Qodî: Brûsk Kobanê Name û Peyname: Ahmet Alî Bozan Cayê Bîyayîşî: Ayn Îsa / Kobanê Maye-Pî: Emîne – Alî Tarîx û Cayê Şehadetî: 20ê Gulana 2021î / Zap

Embaz Rêdûr Silopî de dadîya xo ra bi û Cûdî de tewrê gerîlayan bi. Embaz Rêdûrî Cûdîyî ra heta Garê, Zapî xeylêk waran de gerîlatîye kerde û pê perwerdeyê îdeolojîya Apogîre xeylêk tecrubeyî vistî destî. Embaz Rêdûrî akademîya leşkerî ya gerîlayan de zî perwerde dima derbazê herêma Zapî û rayberîya xeylêk çalakîyan kerde.

Embaz Brûsk Kobanê de dadîya xo ra bi û Şorişê Rojawanî ra dima tewrê gerîlayanê azadîye bi. Embaz Brûskî seba ke dewleta tirke ra qesasê şarê kurdî bigêro tim israr kerd ke şoro waranê şerê giranêrî û nê esasî ser o derbazê herêma Zapî bi. Embaz Brûskî tim xîret kerd ke derbe bido dişmenî ro û 20ê gulane de bombardumanêk de şehîd bi.

7 îşxalkerî ameyî cezakerdene

28ê gulane de warê Cîloyê Qijî yê Zapî de vera îşxalkeranê ke waştêne debikewê mewzîyanê şerî çalakîyêke ameye kerdene. Çalakîye de 2 îşxalkerî ameyî cezakerdene û îşxalkeran xo qedemeyêke apey girewt. Şewdirê a roje de teyarayanê şerî herême 2 reyî daye bombayan ver.

Heman roje vera îşxalkeran hîrê baskan ra çalakîya dekewtişê mîyanî ameye kerdene. Baska yewine mesafeyêka nêzdîye ra da îşxalkeran ro û 3 îşxalkerî ceza kerdî. Baska diyîne da mewzîyê îşxalkeran ro û 2 îşxalkerî ceza kerdî, mewzî îmha kerd. Baska hîrêyîne ya pawitişî zî da îşxalkeran ro la hûmara birîndar û kişteyan nêameye tesbîtkerdene.

Na çalakîye de 7 îşxalkerî ameyî cezakerdene û mewzîyêk ame îmhakerdene. Çalakîye de embazanê ma Zagros Avaşînî û Zeynepe Faraşîn bi çêrî şer kerd û şehîd bîyî. Nasnameyê embazanê ma wina yê:

Nameyê Qodî: Zeynepe Faraşîn Name û Peyname: Mizgîne Akyol Cayê Bîyayîşî: Qoser Maye-Pî: Behiye – Erdal Tarîx û Cayê Şehadetî: 28ê Gulana 2021î / Zap

Nameyê Qodî: Zagros Avaşîn Name û Peyname: Ferdî Mergel Cayê Bîyayîşî: Mûş Maye-Pî: Hayrîye – Mehmet Can Tarîx û Cayê Şehadetî: 28ê Gulana 2021î / Zap

Embaze Zeynepe Qoser de dadîya xo ra bîye û seba famkerdişê felsefeya Rayberîye tewra gerîlayan bîye. Embaze Zeynepe dima bi îdîa rêxistinîya Hêzan ê Taybetan de ca girewt û xebatanê stratejîkan de mesuldarîye girewte xo ser.  Embaze Zeynepe pê kesayetê xo yê zerrînizmî û samîmî zerrîya embazanê xo de ca girewt û Zap de wezîfeyê fermandarîye kerd. Sey fermandarêka YJA-Starî embaze Zeynepe şîye serê îşxalkeran û destanê çêrîye nuşt.

Embaz Zagros Mûş de dadîya xo ra bi û vera tecrîdkerdişê Rayberîye Garzan de tewrê gerîlayan bi. Embaz Zagrosî xoaverberdiş kerd esas û Metîna ra heta Şingal û Zapî xeylêk cayan de bi wayîrê tecrube. Embaz Zagrosî Cîloyê Qijî de bi hawayêkê fedayîyî şi serê dişmenî û derbê giranî dayî dişmenî ro û netîceya nê xoverdayîşê tarîxî de şehîd bi.

Eyaletê Zapî tarîxê têkoşînî qetî rayîr nêda îşxalkeran û tim dersî dayî dişmenî. Nê hêrişanê îşxalî de zî Zap rayîr nêdano îşxalkeran. Performansê şerî yê embazanê ma Agît, Rêber, Rêdûr, Brûsk, Zeynepe û Zagrosî, qerardarî û ruhê înan ê fedayîyî tim embazanê înan rê û şarê kurdî rê mîsal bibê. Perwerîya embazanê ma yê şehîdan, qerardarî û çêrîya înan a vera şehadetî ma rayraşîyayîşê Kurdîstanê Azadî û Rayberîya Azade rê kenê nêzdî.

Ma sere de keyeyanê ercîyayeyan ê embazanê şehîdan rê, pêro şarê welatperwerî yê Kurdîstanî rê serweşîye wazenê.

Bombardumanî

29ê gulane de warê Cîloyê Qijî yê Zapî de îşxalkeran vera tunelanê şerî gazê kîmyewî xebitnayî.

Artêşa tirke ya îşxalkere vera Herêmanê Pawitişî yê Medya pê helîkopter û teyarayanê şerî hêrişî kerdî û Zap û Avaşîn de hêzê xo yê îşxalkerî vurnayî.

Detayê nê hêrişan wina yê:

27ê gulane de warê Sîda yê herêma Zapî pê obusanê qereqolê sînorî dîya bombayan ber. Netîceya nê bombardumanî de erazî de şewat vejîya û şewat hema zî dewam keno.

28-29ê gulane de warê Tabûra Ereban û Werxelê pê obusanê qereqolê sînorî dîyayî bombayan ver. Netîceya nê bombardumanî de erazî de şewat vejîya û şewat hema zî dewam keno.

29ê gulane de Girê Zendûra yê herêma Metîna pê teyarayanê şerî dîya bombayan ver.

Artêşa tirke ya îşxalkere 29ê gulane de Giranê Şehîd Serxwebûnî û Petrutî yê Zapî de û warê Qela Bêdewê de hêzê xo yê îşxalkerî vurnayî.

29ê gulane de artêşa tirke ya îşxalkere waranê Mamreşo, Mervanos û Şêkê yê Avaşînî de hêzê xo yê îşxalkerî vurnayî.

30ê gulane de warê Çemço û Sîda yê herêma Zapî pê obusanê qereqolê sînorî dîyayî bombayan ver.

Nê hêrişan de zerarêk nêresa hêzanê ma ser.''