Merkezê Îrtîbatî û Çapemenîye yê HPGyî bi eşkerayîyêke nasnameyê şehîdêke pare kerd. Eşkerayîye wina ya:

''Embaza ma Çavrê Gelhat 4ê teşrîna verêne ya 2023yî de herêma Metîna de netîceya qezayêkî de şehîd bîye. Cinîya Botanî ya serewedarite û eşiqa azadîye embaza ma Çavrê 9 serrî xeta cinîya azade de bi têkoşînê xo israr kerd û bîye milîtanêka YJA-Starî û PAJKî ya nimûne. Embaza ma Çavrê Gelhat seba ke Şerê Şarî yo Şorişgêr ser bikewo bîye wayîra kedêka pîle.

Ma zaf kewtî verê şehadetê embaze Çavrê. Ma do qetî xeyal û armancanê aye bîyarê ca. Ma sere de keyeyê embaze Çavrê yê ercîyayeyî rê, pêro şarê Kurdîstanî yê welatperwerî rê serweşîye wazenê. 

Nasnameyê embaza ma Çavrê wina yo:

Embaza ma Çavrê Şirnex de mîyanê keyeyêkê welatperwerî yê eşîra Spêrtî de dadîya xo ra bena. Embaze Çavrê hema domanîya xo de têgêrayîşê ma û gerîlayan şinasnena. A tim vera polîtîkayanê asîmîlasyonî yê dişmenî kultur, ziwan û nasnameyê xo pawena. Embaza ma Çavrê hêrişanê DAÎŞî ra dima bi hêrsê pîlî û hîsê qesasî 2014 de Cûdî de tewra gerîlayan bena.

Embaze Çavrê dima derbazê Herêmanê Pawitişî yê Medya bena. A cade adapteyê cuya koyan bena. Embaza ma Çavrê pê perwerdeyan xo aver bena û tim xîret kena ke têkoşînê xo berz bikera. Nê armancî ser o a Akademîya Cinîya Azade ya Şehîde Bêrîtane de tewra perwerdeyan bena. Embaze Çavrê pê kesayet û têkoşînê xo bena mazhara hûrmetê embazanê xo zî. A dima derbazê Heftanînî bena û tîya ra zî derbazê Metîna bena. Embaze Çavrê Metîna de bi xurtî şer kena, bêmabên tewra xebatan bena û serkêşîye kena. A heta şehadetê xo qetî xeta cinîya azade û îdeolojîya Rayberîye ra zî dûrî nêkewena.''