Merkezê Îrtîbatî û Çapemenîye yê HPGyî derheqê 4 gerîlayanê ke 20 gulane de hêrişê hewayî de şehîd bîyî eşkerayîya nuştekîye daye.

Eşkerayîya HPGyî de nê ameyî parekerdene:

''20 gulane de grûbêka embazanê ma yê ke problemê înan ê weşîye estbî wexto ke tedawî ra agêrayêne nêzdîyê dewa Mangîşkê ya Duhokî de raştê hêrişê hewayî yê artêşa tirke ya îşxalkere ameyî.  Hêrişî de 4 embazê şahîd bîyî.

Medyaya şerê taybetî ya dewleta tirke ya ke bi xeberanê zûran şarî xapînena  seba ke vînîkerdişê înan binimo her tewir zûran kena ke serkewtişan ercanan biaaferno. Embazê ma Zagros, Dilgeş, Dara û Firat tedawî ra agêrayêne. Sîvîl û bêçeke bî. Rixmo ke bêçeke bî ameyî hedefgirewtene. Dewleta tirke nê embazê ma sey payeberz ramojnayî la seba ke ê nêweşê nêeşkenê wzîfeyanê winayênan bigerê. Xeberê înan raşt nîyê, zûre kenê. Embazê ma payeberz nêbî la çarheme zî ewladê sînayeyî yê şarê xo û mîlîtanê erjîyayeyî yê partî yê.

Nê serebûtî de yeno fehmkerdene ke reyna engişta tay ajananê cayîyan tede esta. Ajanê bêbextê ke pîya bi MÎTî xebityene gerreyê hemrayanê ma kerd ke ê raştê hêrişî ameyî. Seba ke vera nê ajanan bêvengîye esta û kerdişê înan nêvînayîşî ra yenê, nê bêbextî herême de rehet gêrenê û benê sebebê serebûtanê wînayênan. Ma veng danê şarê Başûrê Kurdîstanî yo ke semedê şorişî bedelê pîlî dayî û ciwananê kurdan ke wa vera ajanîye vengê xo vejê, vera ajanan tewir bîgêrê û înan mîyanê xo de qebûl nêkerê.

Hemrayê ma Zagros keyeyêko welatperwer ê Colelêrgî de ameyo dinya û demo kilm de Têgêrayîşê Azadîye yê Kurdîstanî nas kerdo û 2009 de tewrê sefanê gerîlayan bîyo.  Roja verêne ra heme wezîfeyê xo bi serkewtiş ardî ca bi vindertişê xo yê sade û mutewazî zerrîya hemrayanê xo de ca girewt.

Hemrayê ma Dara keyeyêko welatperwer ê Rolhelatê Kurdîstanî de ameyo dinya.  Bado ke Partîya ma PKK û Rayber Apo nas kerdî polîtîkaya hêrişkare ya rejîmê Îranî dahîna hole fehm kerde û tewirê xo yê şorişgêr ramojna û tewrê sefanê gerîlayan bîyo. Hemrayê ma Dara ke xeylêk waranê Başûrê Kurdîstanî de wezîfe girewt tim fedakere û bêhesab bi.

Hemrayê ma Dilgeş keyeyêko welatperwer ê Mûşî de ameyo dinya û tradîsyonê Serhadî yo xoverdayox xo rê  esas girewt.  Seba ke vera DAÎŞ û dewleta tirke şer bikero verê xo dayo koyanê Kurdîstanî. Hemrayê ma Dilgeşî wezîfeyê şorişgêrê ke şehîdanê ma ra mendî girwtê milê xo ser û seba ke nê wezîfeyî ser bikewê destê ci ra ame kerd.

Hemrayê ma Firat keyeyêko welatperwer ê Riha de ameyo dinya û bi hîkayeyanê xoverdayîşî yê serkêşanê têkoşînî bîyo pîl. Hemrayê ma Firat wexto ke şer tewr giran bi tewrê sefanê gerîlayan bi û xeylêk waranê Kurdîstanî de wezîfe girewt û bi kesayetê xo yê duruts û sadeyî embazanê xo rê bi nimûne.

Sere de keyeyanê erjîyayeyan ê şehîdanê ma Zagros, Dilgeş, Dara û Firat ê ke bi irade û qehremanîya pîle semedê azadîya şarê Kurdîstanî şer kerd, ma heme şarê welatperwerî yê Kurdîstanî rê serweşîye wazenê.''

Nameyê Qodî: Dilgeş Serhat

Name û Peyname: Mehmet Emîn Alka

Cayê Bîyayîşî: Mûş

Maye-Pî: Medîne-Hasan 

Tarîx û Cayê Şehadetî: 20ê Gulana 2021 / Duhok

Nameyê Qodî: Zagros Glort

Name û Peyname:  Selahattîn Dede

Cayê Bîyayîşî: Colemêrg

Tarîx û Cayê Şehadetî: 20ê Gulana 2021 / Duhok

Nameyê Qodî: Dara Bêrîtan

Name û Peyname: Babek Ebdiselendecî

Cayê Bîyayîşî:  Sine

Maye-Pî: Ferîba-Şukrullah 

Tarîx û Cayê Şehadetî: 20ê Gulana 2021 / Duhok

Nameyê Qodî: Firat Şoreş

Name û Peyname: Anter Firat

Cayê Bîyayîşî: Riha

Tarîx û Cayê Şehadetî: 20ê Gulana 2021 / Duhok