Merkezê Îrtîbatî û Çapemenîye yê HPGyî pê eşkerayîyêke pare kerd ke hêrişê artêşa tirke ya îşxalkere yê vera warê Şehîd Remzîyî yê Amedî de 6 gerîlayê cinîyî şehîd bîyî.

Eşkerayîye wina ya:

Çalakîyê Hêzanê Pawitişî yê Hewayî

''Hêzanê ma yê Pawitişî yê Hewayî yê Şehîde Delale 10ê gulane de saete 12.00-13.00 de herêma Metîna de vera îşxalkeranê Girê Zendûra hewayî ra 2 çalakîyî kerdî. Wird çalakîyan de derbê giranî ameyî dayene îşxalkeran.

Şehîdî

27ê nîsane de warê Helezilî yê herêma Şehîd Remzîyî yê eyaletê Amedî de artêşa tirke dest pê operasyonêkî kerd. Tay cayanê herême de hacetê girewtişê fotografan ca kerdî. Dima zî no operasyon 28ê nîsane de ame hîrakerdene û 29ê nîsane de nêzdîyê dewa Kurtî de mabênê hêzanê ma û dişmnenî de şer qewimîya. Destpêkê şerî de xeylêk îşxalkerî ameyî cezakerdene û birîndarkerdene. Îşxalkeran saete 06.00 de bi qedemeyêkî xo apey girewt û herême heta saete 07.40î  daye bombayan ver. Nê şerî de ke temamîya roje de dewam kerd embazanê ma Nûjîne, Berfîne, Besê, Esere, Jîyane û Têkoşîne bi çêrî şer kerd û şehîd bîyî. Operasyonê artêşa tirke ya îşxalkere 5ê gulane de qedîya.

Semedo ke nê şerî de embazê ma şehîd bîyî hûmara kişte û birîndaranê îşxalkeran nêameye zelalkerdene.

Agahîyê serê nasnameyê embazanê ma yê şehîdan dima do rayaumûmîye reyde bêrê parekerdene.

Hêrişê hewayî

Artêşa tirke ya îşxalkere Herêma Pawitişî yê Medya pê helîkopter û teyarayanê şerî dayî bombayan ver. Agahîyê bombardumanan û hêrişan wina yê:

10ê gulane de Girê Zendûra yê herêma Metîna, warê Kêste dîyayî bombayan ver. Şan Girê Sîda û Gelîya Çemçoyî yê Zapî dîyayî bombayan ver û bombardumanî ra dima şewat qewimîya. Heman roje saete 21.00 ra heta 00.30 warê Şukê, Mervanos û Mamreşoyî yê herêma Avaşînî ser o helîkopterî gêrayî. Nê bombardumanan de zerarêk nêresa hêzanê ma ser.''