Merkezê Îrtîbatî û Çapemenîye yê HPGyî (HPG-BÎM) bi eşkerayîyêke hişyar kerd ke PDK amadekarîye keno ke daxîlê şerê mabênê şarê kurdî û îşxalê tirkan bibo.

Eşkerayîye wina ya:

''Zanîyeno ke mabênê ma û dewleta tirke ya îşxalkere de erazîyê hîrayî yê serê Metîna û Avaşînî de prosesê pêkewtişan est o. Bi taybetî 25ê gulane ra nata  Girê Metîna-Amedîyê de mabênê hêzanê ma û artêşa tirke ya faşîste de şerêko giran qewimîyeno. Dewleta tirke vera hêzanê ma teknîkê modernî û çekanê kîmyewîyan ê qedexekerdeyan şuxilnena û rixmê nînan zî nêeşkena aver şora.

No şer mabênê şarê ma û îşxalê tirkan de şerêko zaf tarîxî yo. Labelê goreyê qiseyanê selahîyetdarêkê PDKyî yo ke bi wesfê Hetkarê Wezîrîya Pêşmergeyan û eşkerayîyanê Walîyê Dihokî û goreyê agahîyanê ke resayê ma destî; hêzê PDKyî amadekarîyan kenê ke mudaxeleyê şerê stratejîkî yê mabênê ma û dewleta tirke bikerê. Vakurê Metîna de mabênê hêzanê ma û dewleta tirke de şer qewimîyeno. Rojhelatê Metîna de şerêko giran dewam keno. Wexto ke hêzê PDKyî hetê başûrê Metîna bigêrê, hînî do planê abluqa û îmha yê dewleta tirke temam bikerê. Bi nê hawayî PDK tewrê nê prosesê çinkerdişî do bibo. No plano tehlukeyîn ê PDKyî yê vera Metîna seba ma yeno manaya îlanê şerî. Çunek cayanê girîngan ê Metîna de hêzê ma est ê. Destvistişê nê cayî têna bi hêrişî beno. No zî yeno manaya despêkerdişê prosesê neweyî yo ke qet zerrîya ma ra nêno.

Na rewşe do bêra a mana ke PDK paştdayîşê xo yê seba dewleta tirke do biresno astêka berze. No zî yeno a mana ke PDK do waştişê 'mabênê kurdan de şer vetişî' yê dewleta tirke bîyaro ca. Ganî bizanîyo ke nê şerî rê beşdarîya PDKyî, yanî hêrişê vera hêzanê ma yê Metîna, do têna Metîna de nêmano û şerêkê pêroyî do bido destpêkerdene. Coka ma venga hêzanê sîyasîyan, roşnvîran, hunermend û dezgehanê welatperweran ê Başûrî  û pêro hêzanê Kurdîstanîyan danê ke bi mesuldarî têbigêrê û verê hêrişêkê winasênî bigêrê.

Seba ke mabênê kurdan de şerêk nêqewimîyo heta nika asta tewr berze de ma mesuldarîyê xo ardî ca. Labelê eke vera hêzanê ma yê çeperan hêriş bêro kerdene hêzê ma zî do xo bipawê. Coka eşkera yo ke prosesê verê ma şino rewşêka tehlukeyîne. Coka ma venga pêro şarê xo û hêzanê welatperweran danê ke na babete de erk û mesuldarîyanê xo bîyarê ca.''