Merkezê Îrtîbatî û Çapemenîye yê HPGyî derheqê çalakîyanê gerîlayan û hêrişê dewleta tirke de eşkerayîye.

HPGyî vat: ''Dewleta tirka ke  Zap de vera xoverdayîşê gerîlayan bînkewte, 9ê êlule de hêrişêko newe da destpêkerdene ke operasyonê xo xeta Girê Amedîyê ra heta qismêkê muhîmî yê Metîna vila bikero. Vera Metîna û Herêma Şehîd Delîlî ya Rojhelatê Zapî erd û hewayî bombardumanê giranî ameyî kerdene. Reyna xeylêk waran de bi paştîdayîşê hewayî leşkerî herême de ameyî cakerdene û mabênê hêzanê ma û îşxalkeran de pêkewtişî qewimîyayî. Nê pêkewtişî hema dewam kenê. Eşkerayo ke dewleta tirke seba ke tengayîya Zapî ra bivejîyo nê hêrişî dayî destpêkerdene.

Artêşa tirke ya îşxalkere par mecbur mend ke xetanê coran ê Amedîye ra xo peyser binaco û nê cayî teslîmê PDKyî kerdbi. Şewa 9 û 10ê êlule de artêşa tirke leşkerê xo kişta nê cayanê ke dayî PDKyî û mewzîyanê PDKyî de leşkerê xo ca kerdî.  Heme cayê ke dewleta tirke ameya ci  tede hêzê PDKyî est ê û mewzîyê xo têkişte de viraştî. Wa şarê ma yo welatperwer û rayapêroyîye bizano ke vera nê hêrişê artêşa tirke Gerîlayê Azadîye yê Kurdîstanî do cewab bidê û xoverdayîşê xo yê vera îşxalî xurtêr bikerê.''

Detayê  çalakîyanê gerîlayan û hêrişê îşxalkeran wina yê:

Herêma Şehîd Delîlî ya Rojhelatê Zapî;

''10ê êlule de saetanê serê sibayî ra heta şan Warê Xoverdayîşî yê Girê Cûdîyî de îşxalkerî pê çekanê giranan şeş rey ameyî pirodayene  û 6 mewzîmîyî ameyî derbkerdene. Nê çalakîyî hetê hêzanê ma yê YJA Starî ra ameyî kerdene. Saetanê şanî de çalakîya bîne bi çekanê otomatîkan ameye kerdene, mewzîyêke ameye derbkerdene. Hetê bînî ra hêzanê ma yê YJA Starî Warê Xoverdayîşî yê Girê Amedîyê de panc rey mudaxaleyê helîkopteranê hêrişî kerd ke herême dayêne dombayan ver.

11ê êlule de Warê Xoverdayîşî yê Girê Cûdîyî de îşxalkerî bi çekanê giranan ameyî pirodayene, mewzîyêke ameye derbkerdene. Na çalakîye hetê hêzanê ma yê YJA Starî ra ameye kerdene. Warê Xoverdayîşî yê Girê Amedîyî de zî îşxalkerî bi taktîkê suîkastî ameyî pirodayene, îşxalkerêk ame cezakerdene.

Herêma Zapî;

8ê êlule de Warê Xoverdayîşî yê Kokerê de îşxalkerî pê çekanê ferdîyan ameyî pirodayene.

10ê êlule de Warê Xoverdayîşî yê Girê Amedîyê û Girê Bahar pê teyarayanê şerî ameyî bombardumankerdene. Hetê bînî ra  Warê Xoverdayîşî yê Girê Cûdî û Girê Amedyîyê û Zap û herêma Metîna pê helîkopteranê şerî dîyayî bombayan ver. Reyna herême Zap, Metîna û Xakurkê pê topan dîyayî bombayan ver.''