Merkezê Îrtîbatî û Çapemenîye yê HPGyî derheqê çalakîyanê gerîlayan û hêrişanê îşxalî de eşkerayîyêke daye. Eşkerayîye de nê detayî ameyî dayene:

''Çarçewa Hemleya Şorişgêre ya Cengê Xabûrî de;

5ê hezîrane de Girê Sîserî yê Gelîya Pisaxayî yê Heftanînî de pê taktîkê sabotajî îşxalkerî 2 reyî ameyî pirodayene. Verî wesayîtêk ame hedefkerdene û zereyê wesayîtî de kontrayê bi nameyê Şahîn ame cezakerdene. Reya diyîne de reyna wesayîto ke tede kontrayêk estbi ame hedefkerdene û pirodayene. Çalakîye de no kontra zî birîndar bi.

5ê hezîrane de Girê Koordîne yê Metîna de vera îşxalkeran çalakîya dekewtişê mîyanî ameye kerdene. Çalakîye de verî mewzîyê 3 îşxalkeran ame pirodayene, 3 îşxalkerî ameyî cezakerdene û mewzî ame îmxakerdene. Dima zî mewzîyêko bîn ame derbkerdene.

6ê hezîrane de Girê Zendûra yê Metîna de vera îşxalkeran çalakîyêke ameye kerdene. Mewzîyê îşxalkeran ameyî pirodayene. Na çalakîye de hûmara kişte û birîndaran nêameye tesbîtkerdene.

Dewleta tirke ya îşxalkere Herêmê Pawitişî yê Medya û warê şarê sivîlî yê Başûrê Kurdîstanî pê obus, hawan, helîkopteranê hêrişî û teyarayanê şerî dayî bombayan ver. Detayê bombardumanan wina yê:

5ê hezîrane de Girê Çarçelî û Zendûra yê Metîna dîyayî bombayan ver. Heman roje erazîyê zîretî yê dewanê Golka û Hirorê yê Amedîyê dîyayî bombayan ver. Bombarduman de zerar resa bax û baxçeyanê şarî, erazî de şewat vejîya. Şewatî hema zî dewam kenê. 5ê hezîrane de warê Werxelê yê Avaşînî 3 reyî û Girê Sorî yê Avaşînî dîyayî bombayan ver. Reyna 5ê hezîrane de waranê Mamreşo, Mervanos û Şûkê yê Avaşînî de helîkopterî perrayî. 5ê hezîrane de warê Qela Bêdewê û Ciloyê Qijî yê Zapî 3 reyî dîyayî bombayan ver.

Bombardumanan de zerarêk nêresa hêzanê ma ser.''