Merkezê Îrtîbatî û Çapemenîye yê HPGyî derheqê operasyonê Besta de eşkerayîyêke daye û nasnameyê di gerîlayan eşkera kerdî.

Eşkerayîya HPGyî de ca dîya nînan:

''Herêma Besta de 5ê nîsane de operasyono hîra dîya destpêkerdene. 6ê nîsane de saetanê şefeqê sibayî de bi helîkopteranê hêrişî warê Mewîjkê û qilê Givara û Şehîde Dîyane ameyî bombardumankerdene û eynî wextî de bi helîkopteranê Skorskyan leşkerî tîya ameyî cakerdene. Operasyono ke kontra û qorîcîyî tewrê ci bîyî de pêkewtişî qewimîyayî. Pêkewtişanê  di rojan de xeylêk îşxalkerî ameyî cezakerdene û birîndar bîyî. Pêkewtişan de embezê ma Ozgur Gabar  birîndar û xoraşîyaye kewt destê dişmenî. Keso bi nameyê Êriş Nerexî zî teslîmê dişmenî bîyo. Pêkewtişan de hemrayê ma Dîlane, Hêvî û Tolhildan zî badê xoverdayîşê destankî yê di rojan bi şerkerdişê qehremankî tewrê kerwanê şehîdan bîyî.

Îşkence

Hemrayê ma Ozgur Gabaro ke birîndar esîr kewt, raştê hêrişê sîstemakî yeno ke pîşmanîye qebul bikero la heta nika dişmenî nayî ra netîce nêgirewte. Esîrê şerî rê îşkence yeno kerdene. No binpaykerdişê qanûnê mîyanneteweyî û huqûqê merdimîye yo. Dewleta tirke eşkera sûc kena.

Heşt gerîlayî şehîd bîyî

8ê nîsane de bi zanayîşanê ke Êrişo ke teslîm bîyo dayî operasyonê Besta ame hîrakerdene.  Grûbêka hemrayanê ma kewte pêkewtiş û xoverdayîşo destankî da. Pêkewtişan de xeylêk îşxalkerî ameyî cezakerdene. Nê pêkewtişanê ke heta saetanê şanî dewam kerd de hemrayê ma Nûjîne, Mizgine, Hebûn, Ezda û Firat tewrê kerwanê şehîdan bîyî. 30ê nîsane de operasyon peyser ame antene. Şehîdanê ma ra nasnameyê Nûjîne Sêrt û Firat Şaxî ameyî zelakerdene. Nasaneyê hemerayanê ma Dîlane, Hêvî ,Tolhildan, Mizgîne, Hebûn û Ezda gama ke bêrê zelalkerdene do bêrê parekerdene.

Xayînîye

Êrişo ke teslîmê dişmenî bîyo destê xo kerdî mîyanê gonîya hemrayanê xo. La xayînîya winayêne do şarê Şirnex û Nerexî yê welatperwerî rê lekê mîyaro. Ma pê bawer ê ke şarê Şirnex û Nerexî do vera na xayînîye û heme xayînîyan tewirê xo yê raştî ramojno.

Nûjîne Sêrt

Hemraya ma Nûjîne Sêrt keyeyêko welatperwer û eşîr de bîya pîl.  Rîyê zextê dewlete ra metropolan de menda la çirey welatê xo ra ranêqilîyaya. Hema ke domane bî dişmnê şar û welatê xo nas kerd û 2005 de tewrê sefanê gerîlayan bîya. Zapî ra heta Garê û Metîna cayanê cîya cîyayan de menda û tecrubeyê xo zaf kerd û bîya mîltanêka heskerdîye ya PAJKî. 2010 de verê xo dayo Botanî û heta 2017î xeylêk cayanê Botanî de xebatî rayra berdî û bîya fermandara YJA Starî. Xeylêk wezîfeyê cîyayî bi serkewtişî ardî ca û 2018 reyna  agêraya Botan  û sey  fermandara YJA Starî ya herême Besta de wezîfe girewt. 8ê nîsane ya 2021î de Besta de derbê pîlî dayî îşxalkeran ro û pîya bi çar embazanê xo Azîmîyan ra heta Zelale, Nûda, Sorxwîne, Zeryan, Azê û Delalan tradîsyonê cinîya azade serkewte temsîl kerde û bi hewayêkê qehremankî tewrê kerwanê şehîdan bîya.

Firat Şax

Hemrayê ma Firat Şax keyeyêko welatperwer ê qezaya Şaxî ya Wanî de ameyo dinya. Koyanê Botanî de şiwanîye kerda û mîyanê xozaya ci de bîyo pîl. Têkoşînê Azadîye yê Kurdîstanî nêzdî ra nas kerdo ke cuya hemrayayî gerîlayan ey ser o tesîr kerd. 2014 de warê Kato Jîrka de tewrê sefanê gerîlayan bîyo. Rixmo ke zaf mekteb nêwendo musayîşê felsefe û îdeolojîya Apoyîyî xo rê esas girewto û bi cesaret û zanayîşê bîyo fermandarêk. Katoyî ra heta Besta xeylêk cayan de mendo û derbeyî dayî dişmenî ro. 8ê nîsane ya 2021î de pê xoverdayîşê destankî pîya çar embazanê xo tewrê kerwanê şehîdan bîyo.

Sere de keyeyanê erjîyayeyan ê şehîdanê ma rê ma heme şarê welatperwerî yê Kurdîstanî rê serweşîye wazenê.''

Nameyê Qodî: Nûjîne Sêrt

Name û Peyname: Zeynepe Dayan

Cayê Bîyayîşî: Sêrt

Maye-Pî:  Emîne-Mûsa

Tarîx û Cayê Şehadetî: 8ê Nîsana 2021 / Besta

Nameyê Qodî: Firat Şax

Name û Peyname: Îbrahîm Îldenîz

Cayê Bîyayîşî: Wan

Maye-Pî: Kudrete-Adil

Tarîx û Cayê Şehadetî: : 8ê Nîsana 2021 / Besta