Merkezê Îrtîbatî û Çapemenîye yê HPGyî nasnameyê çar şehîdanê Avaşînî eşkera kerdî. Eşkerayîye wina ya:

''11ê tebaxa 2018î de çalakîyanê bitesîran ê vera artêşa tirke ya îşxalkere ra dima hêrişan de fermandarê ma yo ercîyaye Egîd Zaza û gerîlayê ma Agir, Serhed û Xeyrî şehîd bîyî.

Embazê ma Egîd, Serhed, Agir û Xeyrî tewrbîyayîşê xo ra heta şehadetê xo bîyî ciwanê kurdî yê rûmetênî. Ma sere de keyeyanê înan rê pêro şarê Kurdîstanî yê welatperwerî rê serweşîye wazenê. Ma soz danê ke têkoşînê embazanê xo yê şehîdan seba ke bibê layîqê înan bi mesuldarî biresnê serkewtişî.

Nasnameyê embazanê ma yê şehîdan wina yê:

Embazê ma Egîd Çewlîg de keyeyêkê welatperwerî de dadîya xo ra beno. Embazê ma Egîd ciwanîya xo de têgêrayîşê azadîye şinasneno, namê Xoverdayîşê Zîndanê Amedî yê Xeyrî û Mazlûman eşnaweno û tewrê xebatanê ciwanan beno. O Komployê Mîyanneteweyî ra dima bi hêrsî Almanya ra verê xo dano koyanê Kurdîstanî û 2003 de tewrê gerîlayan beno. Embaze Egîd Hemleya 1ê Hezîrane ra dima derbazê Erziromî beno û çar serran tîya de têkoşînêkê xurtî keno. 2009 de embaz Egîd Îstanbul de wazeno vera dişmenî çalakîye bikero la esîr keweno. Embaz Egîd bi hesreta koyan û bi waştişê azadîye pa komêka embazanê xo Zîndanê Çewlîgî ra fîrar keno la seba ke teber de amadekarîyêka qîm çin bî ancî esîr keweno. Embaz Egîd narey erşawîyeno Zîndanê Amedî. 5ê adara 2016î de embazanê xo de fîrar keno û xo resneno koyan. Embaz Egîd derbazê Zagrosan beno û tîya ra zî sey fermandarêkî derbazê Avaşînî beno. Embaz Egîd Avaşîn de xoverdayîşêkê xurtî keno, şerêkê bêhempayî rê fermandarîye keno û pêro erkanê xo ano ca. Embaz Egîd heta şehadetê xo bi perwerîya Rayberîye seba ke armancê azadîye bîyaro ca xîret keno û şehîd beno. Ma do tim embaz Egîdî mîyanê têkoşînê xo de bidê vîrardene.

Embaz Agir mîyanê keyeyêkê eşîra Jîrkî de şaristanê Burdurî yê Tirkîya de dadîya xo ra beno. Embaz Agir şehadetê ap û kekê xo ra dima 2025 de bi qerardarî vera hêrişanê DAÎŞî derbazê Şingalî beno. Azadkerdişê Şingalî ra dima embaz Agir derbazê koyan beno û Akademîya Şehîd Mehmet Goyîyî de perwerde vîneno. Embaz Agir Avaşîn de çalakîyanê serkewteyan de cagêno û bi şerê heybetînî beno wayîrê kedêka pîle.

Embaz Serhed Sûrê Amedî de dadîya xo ra beno. Embaz Serhed hêverî xebatanê ciwanan de cagêno û Şorişê Rojawanî ra dima 2015 de Amedî ra tewrê gerîlayan beno. O wextêk Vakur de maneno û dima derbazê Herêmanê Pawitişî yê Medya beno. Embaz Serhed 2016 de Avaşîn de wezîfe gêno û tîya de tewrê xoverdayîşê pîlî beno. Embaz Serhed heta şehadetê xo zî tewirê xo ra tawîz nêdano û bi qehremanî şino serê dişmenî.

Embaz Xeyrî Westanê Wanî de dadîya xo ra beno. Embaz Xeyrî bi Şorişê Rojawanî keweno binê tesîrêkê pîlî û 2015  de hêrişanê vera Rojawanî ra dima Wanî ra tewrê gerîlayan  beno. O dima derbazê Herêmanê Pawitişî yê Medya beno û bi perwerdeyan xo aver beno. Embaz Xeyrî Avaşîn de çalakîyanê serkewteyan de kedêka pîle dano. O tim xîret keno ke azadîya Rayber Apoyî û Kurdîstanî bîyaro ca û heta şehadetê xo peyê armancanê xo de şino.''