Merkezê Îrtîbatî û Çapemenîye yê HPGyî nasnameyê di şehîdanê Metîna eşkera kerdî. Eşkerayîye wina ya:

''14ê teşrîna verêne ya 2023yî de Metîna de hêrişanê dişmenî de embazê ma ewladê Amedî yo çêr Huseyîn Pîran û milîtana YJA-Starî ya serkêşe Rûkene Zîlan şehîd bîyî. 

Nê embazê ma bi tewrbîyayîş, cu û tewirê xo yê Apogîrî her ca de û her wext bîyî milîtanê serkêşî. Şehadetê embazanê ma Huseyîne û Rûkene seba ma çend giran bibo zî ma rê do bibo sebebê pîlkerdişê têkoşînî. Ma sere de keyeyanê înan ê ercîyayeyan rê pêro şarê Kurdîstanî yê welatperwerî rê serweşîye wazenê. Ma soz danê ke do bibê perwerê vîrameyîşanê şehîdanê xo.

Nasnameyê embazanê ma yê şehîdan wina yê:

Nameyê Qodî: Huseyîn Pîran Name û Peyname: Cahît Aktay Cayê Bîyayîşî: Amed Maye-Pî: Salîha – Mehmet Tarîx û Cayê Şehadetî: 14ê Teşrîna Verêne ya 2023yî /Metîna

Nameyê Qodî: Rûkene Zîlan Name û Peyname: Zeynepe Sevim Cayê Bîyayîşî: Sêrt Maye-Pî: Xatûne – Haci Tarîx û Cayê Şehadetî: 14ê Teşrîna Verêne ya 2023yî /Metîna

Embazê ma Huseyîn qezaya Pîranî ya Amedî de keyeyêkê welatperwerî de dadîya xo ra beno. Embaz Huseyîn domanîya xo ra nata wazeno tewrê gerîlayan bibo. Dima ke embazê ci yê domanîye şehîd beno bi hîsê hêrs û qesasî o 2008 de verê xo dano koyan beno gerîla. Embaz Huseyîn destpêk de hîrê serran Qendîl de pratîk keno û naye ra pey 3 serran Zap de çalakîyanê serkewteyan keno. Embaz Huseyîn 2014î ra heta 2017î Botan de warê Kato Jîrka de serkêşîya têkoşînî kenı. 2017 de o Dibistana Merkezî ya Mazlûm Doganî de perwerde vîneno. Embazê ma Huseyîn hêrişanê dişmenî ra dima bi hêrsî derbazê Metîna beno û tîya de Warê Xoverdayîşî yê Girê Hekarî û Zendûra de bi fedayîtî şer keno. Embaz Huseyîn tim keno ke qesasê şehîdan bigêro û bibo layîqê şehîdan. O nê oxirî de bi qehremanî şehîd beno.

 

 

Embaza ma Rûkene mîyanê keyeyêkê koçerî de Sêrt de dadîya xo ra bena. Embaza ma wareyan de gerîlayan nêzdî ra şinasnena. Embaze Rûkene şehadetê embazan, merdiman û waya xo Zîlane (Mercane Sevîm) ra dima 2014 de serrgêra Hemleya 15ê Tebaxe de Garzan de tewra gerîlayan bena. A wextêk Garzan de têkoşîn kena û dima Herêmanê Pawitişî yê Medya de Garê de perwerde vînena. Embaze Rûkene bi perwerdeyan bena milîtanêka YJA-Starî ya serkewte û nasnameyê cinîya azade mojnena. A Akademîya Cinîya Azade ya Şehîde Bêrîtane de zî perwerde vînena û derbazê Metîna bena. Embaze Rûkene Metîna de refanê tewr vernî de vera dişmenî bi hêzê pîlî şer kena û şehîd bena.''