Merkezê Îrtîbatî û Çapemenîye yê HPGyî da zanayene ke di gerîlayî  Herêmanê Pawitişî yê Medya de şehîd bîyî û nê vatî:

“Hemrayê ma Soro Amanos û Şîyar Amed tarîxanê cîya cîyayan de Herêmanê Pawitişî yê Medya de tewrê kerwanê şehîdan bîyî.

Mîlîtanê fedayîyî yê serkêşî yê Şerê Şarî yê Şorişgêrî hemrayê Soro û Şîyar sefanê verênan ê têkoşînê efsaneyi yê vera îşxalkeran de ca girewt û alaya serkewtişî têşaye. Hemrayanê ma yê ke her hela cuyeya xo bi têkoşînî ravîyarna mîraso biheybet xo dima verda. Ma wird
hemrayanê xo yê erjîyayeyan Soro û Şîyarî bi hurmet û mînetî yad kenê sere de keyeyanê ê xo yê welatperweran heme şarê Kurdîstanî rê serweşîye wazenê û soz danê ke ma do waştişê şehîdanê xo bîyarê ca.

Nasnameyê şehîdanê ma wina yê:

Hemrayê ma Soro Qilabanê Şirnexî de sey ferdêkê eşîrê Goyî yeno dinya û hema domanîya ci de keyeyê ci seba ke dewleta tirke dewa ci vêşneno mecbûr maneno ke bar bikero şiro Îstanbulî. Hemrayê ma Soro rixmo ke welatê xo ra dûrî de beno pîl kulturê xo ra dûrî nêkewno. Hema domanîya xo de seba ke merdimê ci zî tede yê Têkoşînê Azadîye yê Kurdîstanî nas keno. Hemrayê ma Soro seba ke qesasê ema xo Mikê, xalê xo Xalit Goyî-Kutas Uper û dezaya xo Dijwar Goyî-Samî Piranogluyî û bi hezaran şehîdan bîgêro 2013 de tewrê refanê gerîlayan beno.

Hemrayê ma Soro herêma Mêrdînî de tewrê gerîlayan beno û perwerdeyê xo yê verînî zî tîya
hemrayanê xo ra geno. Bado ke tîya binê pratîk vîneno seba ke vera çeteyanê DAÎŞî şer bikero verê xo dano Rojawanî û ûca ra ravîyareno Şingalî. Rojawan de rixmo ke di rey birîndar beno çirey têkoşînî ra dûrî nêkewno. Bado ke Rojawan û Şingla de wezîfeyê xo bi serkewtişî ano ca reyna verê xo dano koyanê Kurdîstanî.

Verî herêma Zapî de Akademîya Şehîd Mehmed Goyî de perwedeyê leşkerî vîneno û dima ra waranê Şehîd Rustemî, Gelîyê Zapî, Kurojahro, Çîyayê Reşî û Ertûşî de têkoşîn keno û derbanê giranan dano dişmenî ro. Wextê şerî de birîndar beno û heta 2017î Zap de maneno dima tewrê Hêzanê Taybetan beno. 2021 de reyna şino Zap û xeylêk çalakîyanê serekewteyan ca geno û bi tersî şino dişmenî ser. Hemrayê ma Soro 10ê hezîrana 2022yî de warê Saca yê Zapî de hêrişê dişmenî de tewrê kerwanê şehîdan beno.

Hemrayê ma Şîyar Mersîn de keyeyêkê welatperî de yeno dinya û hema domanîya xo ra rîyê leyminî yê dewleta tirke ya faşiste nas keno. Hemrayê ma Şîyar gama ke unîversîte de waneno tewrê xebatanê ciwanan beno, dima tepişyeno û di serrî zîndan de maneno. Bado ke zîndanî ra vejîyeno 2017 de verê xo dano koyanê Kurdîstanî. Perwerdeyê gerîlatîye yê esasî Zap de vîneno û tîya pratîk de ca geno. Dima ra sey gerîlayê pîsporî Zap de gerîlatîye keno. Xeylêk çalakîyan de cayê xo geno û derbanê giranan dano faşîstan ro. Hemrayê ma Şîyar sey fedayîyî şer keno û xo dima mîrasêk verda ke do çirey nêro vîrakerdene. Hemrayê ma Şîyar 30ê hezîrana 2022î de tewrê kerwanê bêmergan beno.”