Merkezê Îrtîbatî û Çapemenîye yê HPGyî nasnameyê 3 gerîlayanê ke Wan de şehîd bîyê eşkera kerdî. Eşkerayîye wina ya:

''Gerîlayê azadîye yê Kurdîstanî her roje xoverdayîşê xo yê vera îşxalkeran kenê pîlêr. Planê qirkerdişî yê dewleta tirke bi nê hawayî xêrê nê xoverdayîşê destanwarîyî ra ame şiknayene. Xora şiknayîşê nê hêrişan de xoverdayîşo tarîxî yê Rayber Apoyî dîyarker o. Milîtanê Rayber Apoyî gerîlayê azadîye seba ke layîqê xoverdayîşê ci bibê û mesuldarîyanê xo bîyarê ca têkoşînêkê bêmabênî kenê. No têkoşîno ke pê ked û îradeyêkê bêhempayî yeno averberdene bi bihayê şehadetan yeno afernayene. Embazanê ma Jîyane, Çekdar û Argeşî warê Wanî yê Vakurê Kurdîstanî de bi pratîkê şerê giranî serkêşîya têkoşînî kerde. 6ê temmuza 2022yî de pêkewtişê vera dişmenî de înan bi fedayîtî şer kerd û şehîd bîyî. Nê şehadetê înan ferman danê ma ke xoverdayîşî berzêr bikerê û bi serkewtişî tacîdar bikerê. Ma soz danê ke do serê ferman û xeta şehîdan de bêmabên têkoşîn bikerê, dewaya xo ya azadîye qetî bi serfîrazîye tacîdar bikerê. Ma şexsê Jîyane, Çekdar û Argeşî de sozê xo yê seba şehîdan dibare kenê û îfade kenê ke armanc û xeyalanê şehîdanê xo bîyarê ca.

Nasnameyê embazanê ma yê şehîdan wina yê:

Embaze Jîyane keyeyêkê dihijî de Mersîn de dadîya xo ra bena. Embaze Jîyane verî tewra xebatanê ciwanan bena dima zî 2014 de tewra gerîlayan bena. A perwerdeyan ra dima derbazê Zapî bena. Embaze Jîyane dima ke tecrubeyanê girîngan visnena destî bena fermandare û derbazê Vakurî bena, Wan de dest pê pratîkî kena. Embaze Jîyane nişka ra derban dana dişmenî ro. A pê tewrbîyayîşê xo yê samîmî, fedakar û serkêşî cade adapteyê warî bena û heta şehadetê xo zî wezîfeyanê xo bi serkewtişî ana ca.

Embaz Argeş Wan de dadîya xo ra beno. Embaz Argeş 2014 de bi hişmendîya azadîye Wanî ra tewrê gerîlayan beno. Embaz Argeş heta şehadetê xo Wan de wezîfe keno û tim beno perwerê şehîdan û Rayber Apoyî. Embaz Argeş pêro wezîfe û mesuldarîyanê xo bi serkewtişî ano ca û beno namzetê fermandarî. Embaz Argeş tim bi qedrdayîşê embazanê xo embazîye berz keno. O pîlbîyayîşê têkoşînê ma de beno wayîrê kedêka bêhempa û tim beno fermandarêko winasên ke mîyanê xîretanê xoaverberdişî de beno.

Embaz Çekdar Wan de dadîya xo ra beno. Embaz Çekdaro ke babîyê ci hetê rejîmê faşîstî ra tepişîyabi, tewrbîyayîşê dezayê xo ra dima 2015 de tewrê gerîlayan beno. O verî derbazê Herêmanê Pawitişî yê Medya beno û gerîlatîye pratîze keno. O perwerdeyan ra dima derbazê Vakurê Kurdîstanî beno û xo her hetî ra aver beno. Embaz Çekdar pê kesayetê xo im beno çimeyê moral û hêzî yê embazanê xo. Embaz Çekdar pê tewrbîyayîşê xo keno ke têkoşînê ma ser de rêçê xo verbido.

Ma sere de keyeyanê înan ê ercîyayeyan rê pêro şarê welatperwerî yê Kurdîstanî rê serweşîye wazenê û soz danê ke armancanê ezîzan ê şehîdanê xo bîyarê ca.''